Qubla Koreya sentyabr ayında Oraylıq Aziyanıń bes mámleketi – Qazaqstan, Ózbekstan, Túrkmenstan, Tájikstan hám Qırǵızstan qatnasıwında óziniń birinshi sammitin ótkeredi.
Yonhap agentliginiń xabar beriwinshe, Qubla Koreya Sırtqı isler ministrligi bul haqqında járiyaladı.
Sammit 16-17-sentyabr kúnleri bolıp ótedi.
Qubla Koreya sırtqı isler ministri CHo Xyun tayarlıq májilisinde sammit mámlekettiń regiondaǵı diplomatiyalıq abırayın keńeytiw hám burınǵı Mun CHje In húkimeti tárepinen baslanǵan “Jańa Arqa siyasatı” baslamasın bekkemlew ushın áhmiyetli imkaniyat bolatuǵının atap ótti.
“Bul strategiya Evraziyada tınıshlıq hám ulıwma abadanlıq koncepciyası sheńberinde Oraylıq Aziya mámleketleri menen birge islesiwdi rawajlandırıwǵa qaratılǵan,” dep atap ótti ol.
Ministrdiń sózlerine bola, sammit tek ǵana óz-ara birge islesiwdi bekkemlep qoymastan, al támiynat shınjırın diversifikaciyalaw hám regiondaǵı etnikalıq koreys jámáátleri menen baylanıslar sıyaqlı tarawlarda birgeliktegi jumıslar ushın da tiykar jaratadı.

Qaraqalpaqstan xabar agentligi