Nawayı qalasında milliy gúres boyınsha eresekler arasında Ózbekstan kubogı jarısı bolıp ótti.
Jarısqa elimizdiń barlıq aymaqlarınan eń kúshli palwanlar qatnasıp, 8 salmaq kategoriyası boyınsha óz-ara bellesti.
Tilekke qarsı, erler arasındaǵı jarısta komandamızdıń birde-bir palwanı medal qolǵa kirgize almadı.
Al, qızlarımız bolsa, 2 altın, 3 gúmis medalların jeńip alıwǵa miyasar boldı. Atap aytqanda, 48 kg salmaqta Mehriban Qdırbaeva, 87 kg da Larisa Tórejanova hám +87 kg da Sabrina Uzaqbaevalar ekinshi orındı iyelegen bolsa, 87 kg da Aygúl Adilbaeva, +87 kg da Saneayim Erkinbaevalar Ózbekstan kubogi iyesine aylandı.
– Qızlarımız bul jarısta ózleriniń hár tárepleme jigerliligin kórsetip, hayal-qızlar arasında birinshi orındı iyelewge miyasar boldı, – deydi tájiriybeli trener Jamshid Turabaev. – Búgin komandalıq bellesiwler ótkeriledi. Bul jarısta da respublikamız komandasınan jaqsı nátiyjeler kútip qalamız.
Jeńimpaz qızlarımızdı bul jarısqa trenerlerden Berik Júsipbekov, Nókisbay Daniyarov, Nurbergen Qudaybergenov hám Sándiwǵash Qıdırbaevlar tayarladı.
Jarıs búgin de dawam etedi.

Adilbay Orazov,
Qaraqalpaqstan xabar agentligi sholıwshısı