Qaraqalpaqstan Respublikası Prokuraturası hám Qaraqalpaqstan Respublikası Sudı tárepinen tastıyıqlanǵan reje-grafik tiykarında sudyalar hám prokuratura xızmetkerleriniń bilim hám tájiriybesin arttırıw, kásiplik kónlikpelerin bekkemlewge qaratılǵan oqıw-seminarları turaqlı túrde shólkemlestirilmekte.
Bunday ilajlardı ótkeriwden tiykarǵı maqset – tergewdiń sapasın hám nátiyjeliligin bunnan bılay da arttırıwdan, tergew hám sud processlerinde nızam normaların durıs hám birdey qollanıwdı támiyinlewden, sol arqalı puqaralardıń huqıqları menen nızamlı máplerin isenimli qorǵawdan ibarat. Sonday-aq, ámeldegi nızamshılıqqa kirgizilip atırǵan ózgerisler hám qosımshalardıń áhmiyetin huqıq qorǵaw uyımlarınıń xızmetkerlerine hár tárepleme jetkeriw hám huqıqbuzarlıqlardıń aldın alıw tiykarǵı wazıypalar sıpatında belgilengen.
Qaraqalpaqstan Respublikası Prokuraturasında ótkerilgen náwbettegi seminar jınayat isleri boyınsha sudlarda hákimshilik huqıqbuzarlıqlarǵa baylanıslı isler boyınsha qáliplesken sud ámeliyatı hám islerdi kórip shıǵıwda itibar qaratılıwı zárúr bolǵan áhmiyetli táreplerge baǵıshlandı.
Ilajda sud ámeliyatındaǵı áhmiyetli máseleler – nızam normaların basqıshpa-basqısh hám birdey qollanıw, dálillerdi qalıs bahalaw, huqıqbuzarlıq quramın durıs kvalifikaciyalaw sıyaqlılar hár tárepleme dodalandı. Sol arqalı jámiyetlik tártipti támiyinlew hám puqaralardıń huqıqların isenimli qorǵawda sudlardıń juwapkershiligi hám ornı jáne bir márte atap ótildi.
Seminarǵa Jınayat isleri boyınsha Nókis qalası hám Moynaq rayonı sudınıń tergew sudyaları D.Srajatdinov penen B.Dosımbetovlar qatnasıp, ámeliyatta ushırasıp atırǵan ayırım mashqalalı jaǵdaylar boyınsha óz-ara pikirlesti. Atap aytqanda, Ózbekstan Respublikasınıń Hákimshilik juwapkershilik haqqındaǵı kodeksinde názerde tutılǵan 592-statya (shańaraqlıq, yaǵnıy turmıslıq zorlıq), 60-statya (tábiyǵıy resurslarǵa iyelik etiw huqıqın buzıw), 61-statya (az muǵdarda talan-taraj etiw), 131-statya (transport quralların más halda basqarıw) larına baylanıslı isler boyınsha qáliplesken sud ámeliyatı tallandı. Anıq mısallar tiykarında huqıqıy jantasıwlar kórip shıǵılıp, birden-bir sud ámeliyatın qáliplestiriw máseleleri dodalandı.
Ilaj juwmaǵında bunday oqıw-seminarlar nızam ústinligin támiyinlew hám ádil sudlawdıń sapasın arttırıwda úlken áhmiyetke iye ekeni ayrıqsha atap ótildi.

Qaraqalpaqstan xabar agentligi