Prezident Shavkat Mirziyoev kreativ ekonomikanı rawajlandırıw, mádeniyat mákemeleriniń infrastrukturasın jaqsılaw hám jańa kreativ maydanlardı shólkemlestiriw boyınsha prezentaciya menen tanıstı.
Búgingi kúnde kreativ ekonomika kóplegen mámleketlerde ekonomikalıq ósiwdiń tiykarǵı drayverlerinen birine aylanbaqta. Dúnya jalpı ishki óniminiń 3-7 procenti usı tarawdıń úlesine tuwra keledi. Mámleketimizde 2024-jılı kreativ ekonomikanıń JIÓdegi úlesi 3,7 procentti yamasa 56,8 trillion sumdı quraǵan, eksport kólemi bolsa 770,6 million dollarǵa jetken, tarawda 319 mıńnan aslam xalıq bánt.
Xalıqtıń 60 procentten aslamı jaslar ekeni, sanlı infrastrukturanıń jedel rawajlanıp atırǵanı hám mádeniy miyrasımızdıń baylıǵı bul tarawda “úlken sekiriw” islew ushın bekkem tiykar jaratıp atırǵanı atap ótildi.
Usı maqsette 2024-jılı kreativ ekonomika haqqında ayrıqsha nızam qabıl etilip, tarawdıń huqıqıy tiykarı jaratılǵan edi. Kreativ industriya parki shólkemlestirilip, onıń rezidentleri ushın arnawlı salıq rejimi engizildi. Sonıń ishinde, dáramat salıǵı hám sociallıq salıq stavkası 12 procentten 6 procentke túsirildi. Tarawdaǵı isbilermenlerge bir qatar basqa da jeńillikler berildi.
Mine, usı ilajlar esabınan 2030-jılǵa shekem kreativ ekonomikanıń JIÓdegi úlesin 5 procentke yamasa 145 trillion sumǵa jetkeriw, eksporttı 1 milliard dollarǵa alıp shıǵıw, tarawda bánt xalıqtı 500 mıńnan arttırıw maqset etilgen.
Prezentaciyada Tashkent qalasında jaylasatuǵın Kreativ industriya parkiniń koncepciyası kórip shıǵıldı. Onda jasıl baǵ, art-obektler, xalıqaralıq programmalastırıw tarmaǵınıń Tashkent mektebi, kitap kafesi, sport maydanshaları, dóretiwshilik pavilonlar, kovorking orayı hám ofisler, kino hám video islep shıǵarıw maydanları, dawıs jazıw studiyası, kreativ industriya kampusı jáne jaslar hám dóretiwshiler ushın miymanxana qurıladı. Joybar mámleketlik-jeke menshik sheriklik tiykarında ámelge asırıladı.
Sonday-aq, Jańa Tashkent aymaǵı hám Nókis qalasında kreativ parkler shólkemlestiriliwi rejelestirilgen.
Jańa Tashkentte kreativ park rezidentleri ushın ijara maydanları, studiyalar, media hám ánjuman zalları, kommerciyalıq hám xızmet kórsetiw obektleri jaylastırılsa, Nókis qalasınıń Istiqlol baǵındaǵı pavilon rekonstrukciyalanıp, kóp funkciyalı jámiyetlik-mádeniyat orayına aylandırıladı.
Nókistegi kreativ park joybarınıń itibarlı tárepi sonda, onda Ózbekstannıń “EKSPO-2025″tegi milliy pavilonı jaylastırıladı hám janında zamanagóy kitapxana qurıladı.
Elimizdegi mádeniyat oraylarınıń jumısı sın kózqarastan tallandı.
Respublikadaǵı 800 den aslam mádeniyat orayınıń yarımınan kóbi ońlawǵa mútáj jaǵdayda ekeni atap ótildi. Kópshilik mádeniyat orayları elege shekem eskishe islep atırǵanı, tiykarınan bayram ilajların ótkeriw menen sheklenip qalǵanı kórsetip ótildi.
Sonlıqtan, mádeniyat orayların zamanagóy úlgi tiykarında rawajlandırıw boyınsha pilot joybar islep shıǵılǵan. Joybar Tashkent, Qoqand, Buxara hám Samarqandtaǵı 4 oraydı qamtıp alǵan bolıp, birinshisi Tashkent qalasındaǵı “Gúlshan” mádeniyat orayı negizinde shólkemlestirilmekte. Onda “mádeniyat – bilimlendiriw – dem alıw – qarım-qatnas” shınjırı tiykarında hár qıylı baǵdarlardaǵı klublar, ustaxanalar, studiyalar hám dógerekler shólkemlestiriledi.
Prezentaciyada Ullı Britaniya Patshalıq qorı mektebiniń tájiriybesi tiykarında Tashkent qalasında Dástúriy kórkem óner joqarı mektebin shólkemlestiriw rejeleri de kórip shıǵıldı.
Bul joqarı mektep gúlalshılıq hám gerbish óriw, dekorativ bezew, aǵash oymakerligi, arxitekturalıq kalligrafiya, geometriyalıq hám biomorf naǵıs baǵdarlarında bakalavriat hám magistratura baǵdarlamaların ámelge asıradı. Bilimlendiriw inglis tilinde alıp barıladı, eki jıllıq baǵdarlama tiykarında qánigeler tayarlanadı. 2027-jılı 50 qánige tayarlaw, 2031-jılǵa kelip, jılına 80 kadr quwatlılıǵına shıǵıw rejelestirilgen.
Sonday-aq, prezentaciyada Milliy restavraciya institutın shólkemlestiriw, Samarqand qalasındaǵı Bibixanım meshitin restavraciyalaw, “Túrkstan” jazǵı amfiteatrın ońlaw joybarları kórip shıǵıldı. Joybarlastırıw hám restavraciyalaw jumısların YuNESKO menen tolıq kelisilgen halda ámelge asırıw zárúrligi atap ótildi.
Mámleketimiz basshısı kreativ ekonomikanı rawajlandırıw tek ǵana mádeniy emes, al ekonomikalıq jaqtan strategiyalıq áhmiyetke iye ekenin atap ótip, belgilengen joybarlardıń orınlanıwın sapalı támiyinlewge kórsetpe berdi.

ÓzA