“Ózbekstan – 2030” strategiyasında belgilengen tiykarǵı baǵdarlar hám 2026-jıl – “Máhálleni rawajlandırıw hám jámiyetti ilgeriletiw jılı” Mámleketlik baǵdarlamasınıń orınlanıwın támiyinlewde jaslardıń intellektuallıq potencialı, ásirese, hayal-qızlardıń ilim hám innovaciya tarawındaǵı belsendiligi úlken áhmiyetke iye bolmaqta. Usı maqsette ÓzLiDeP Qaraqalpaqstan Respublikası Keńesiniń baslaması menen “Kreativ isbilermen jaslar” joybarı turaqlı túrde ámelge asırılmaqta.
Joybar sheńberinde «11-fevral – Ilimpaz qızlar kúni» múnásibeti menen Berdaq atındaǵı Qaraqalpaq mámleketlik universitetinde ruwxıy-aǵartıwshılıq ilaj shólkemlestirildi. Bul ilaj hayal-qızlardıń ilim tarawındaǵı belsendiligin arttırıw, jas qızlardı ilimiy izleniwlerge keńnen tartıw, sonday-aq, ilimpaz hám izertlewshi hayal-qızlardıń jetiskenliklerin úgit-násiyatlawǵa qaratıldı.
Ilajda Ózbekstan Liberal-demokratiyalıq partiyasınıń Qaraqalpaqstan Respublikası Joqarǵı Kenesi deputatı, siyasiy ilimler doktorı, professor Almagúl Bayrieva, sonday-aq, ximiya ilimleri doktorı, docent Oksana Seytnazarovalar qatnasıp, bayanatlar menen shıǵıp sóyledi. Ushırasıw dawamında mámleketimizde hayal-qızlardı hár tárepleme qollap-quwatlaw, jas ilimpaz qızlar ushın jaratılıp atırǵan keń imkaniyatlar, ilim, bilimlendiriw hám innovaciya tarawında ámelge asırılıp atırǵan sistemalı reformalarǵa ayrıqsha toqtap ótildi. Sonıń menen birge, mámleketlik siyasatta hayal-qızlardıń intellektuallıq qábiletin rawajlandırıw tiykarǵı wazıypalardan biri ekeni atap ótildi.
Ásirese, ilimdi isbilermenlik penen úylestiriw, jaslardıń kreativ ideyaların ámeliyatqa engiziw, startap hám innovaciyalıq joybarlardı qollap-quwatlawǵa qaratılǵan partiya baslamaları búgingi kúnde ayrıqsha áhmiyetke iye ekeni atap ótildi. Bul bolsa jaslardı teoriyalıq bilim menen sheklenip qalmastan, onı ekonomikalıq hám sociallıq nátiyjege aylandırıwǵa shaqırmaqta.
Ilaj sońında ilim hám izertlew tarawında belsendilik kórsetip atırǵan ilimpaz hám izertlewshi qızlar tán alındı, olardıń ilimiy jetiskenlikleri keń jámiyetshilikke tanıstırıldı. Bunday tán alıw jas qızlardıń ilimge bolǵan qızıǵıwshılıǵın jáne de arttırıw, olardı jańa ideya hám baslamalar menen shıǵıwǵa ruwxlandırıwǵa xızmet etedi.
Bul ruwxıy-aǵartıwshılıq ilaj Jańa Ózbekstanda hayal-qızlardıń jámiyetlik turmıstaǵı ornı barǵan sayın bekkemlenip atırǵanın, partiyanıń jaslar hám ilimpaz qızlardı qollap-quwatlaw baǵdarındaǵı izbe-iz siyasatın jáne bir márte kórsetti. Ilimiy, kreativ hám intaker jaslar bolsa mámleket rawajlanıwınıń eń isenimli tayanıshı esaplanadı.

Qaraqalpaqstan xabar agentligi