Májbúriy orınlaw byurosınıń basshıları hám Qaraqalpaqstan Respublikası basqarması tárepinen sistemada kóp jıllar dawamında hadal hám pidayı xızmet etken bir topar taraw pidayıların pensiyaǵa shıǵarıwǵa baǵıshlanǵan saltanatlı máresim shólkemlestirildi.
Ilajda jámlengen jeke quram menen bir qatarda, qalalıq hám rayonlıq bólimlerdiń xızmetkerleri de videokonferencbaylanıs arqalı aralıqtan turıp qatnastı.
Máresimde nızam ústinligin bekkemlew, puqaralardıń huqıqları menen erkinliklerin qorǵaw jolında sheksiz úles qosqan veteran xızmetkerler M.Davletklichev, A.Sernazarov, J.Kalmuratov, R.Xabibullaevalarǵa joqarı húrmet kórsetildi.
Byuro basshıları tárepinen pensiyaǵa shıǵıp atırǵan xızmetkerlerdiń kásiplik sheberligi hám bay turmıslıq tájiriybesi jas xızmetkerler ushın haqıyqıy úlgi mektebi ekeni ayrıqsha atap ótildi. Ásirese, olardıń sistema rawajlanıwı jolındaǵı kóp jıllıq nátiyjeli xızmetleri taraw tariyxında áhmiyetli iz qaldıratuǵını atap ótildi.
Basqarma baslıǵı I.Arziev óziniń shıǵıp sóylegen sózinde veteranlarǵa tereń minnetdarshılıq bildirip, jámááttiń qızǵın mehir hám húrmetin bildirdi. Ilaj dawamında pensiya jasına jetken xızmetkerlerge bekkem densawlıq, shańaraqlıq tınıshlıq hám abadanlıq tiledi.
Álbette, bunday ilajlar Byuro uyımlarında xızmet etken xızmetkerlerdi húrmetlew, kásiptiń abırayın arttırıw hám “ustaz-shákirt” dástúrleriniń dawamlılıǵın támiyinlewge xızmet etedi.

Qaraqalpaqstan xabar agentligi