Bajıxana komitetiniń baslıǵı A.Mavlonov basshılıǵındaǵı delegaciya Jenevada áhmiyetli forumlarda qatnasıw menen bir qatarda eki tárepleme ushırasıwlar da ótkermekte.
Sonıń ishinde, BMSh Evropa ekonomikalıq komissiyasınıń basshısı Tatyana Molchan menen ushırasıw bolıp ótti.
BMShtıń bes regionallıq komissiyasınan biri esaplanatuǵın bul strukturaǵa 56 mámleket aǵza bolıp, olardıń qatarına Evropa, Oraylıq Aziya hám Arqa Amerika mámleketleri kiredi.
Búgingi kúnde Ózbekstan Evropa ekonomikalıq komissiyası menen BMShtıń Oraylıq Aziya ekonomikası ushın arnawlı baǵdarlaması — “SPECA” sheńberinde sawda hám transport sistemaların ápiwayılastırıw baǵdarında jedel birge islesip kelmekte.
Baǵdarlama sheńberinde qatnasıwshı mámleketlerde eTIR sistemasın engiziw, xalıqaralıq jetkerip beriw shınjırlarında “UN/CEFACT” standartların qollanıw hám transport júk xatların elektron túrde paydalanıw názerde tutılǵan.
Dúnyada birinshi bolıp eTIR qollanǵan halda dáslepki tasıwdı tabıslı ámelge asırǵan mámleket sıpatında Ózbekstan tárepi ushırasıwda bir qatar baslamalardı alǵa qoydı.
Sonıń ishinde, Tashkent qalasındaǵı Bajıxana institutı bazasında tek ǵana eTIR emes, al BMShtıń basqa da sanlı qurallarına ótiwge baǵıshlanǵan oqıw kursların shólkemlestiriw usınıs etildi. Sonday-aq, Oraylıq Aziya mámleketleriniń mámleketlik hám jeke menshik sektor wákilleri ushın BMSh, Jáhán sawda shólkemi hám Jáhán bajıxana shólkeminiń ekspertlerin tartqan halda birgeliktegi bilimlendiriw baǵdarlamasın islep shıǵıw máselesi dodalandı.
Óz gezeginde, bul baslama Molchan xanım tárepinen qollap-quwatlandı hám Evropa komissiyasınıń Xalıqaralıq sawda orayı “Learning Portal” bilimlendiriw málimleme sistemasın Bajıxana institutı bilimlendiriw baǵdarlamaları menen integraciyalaw usınısı bildirildi.
Bul bolsa sırtqı sawda tarawında jumıs alıp barıp atırǵan qánigelerdiń tayarlıq dárejesi hám xabardarlıǵın sezilerli dárejede arttırıw imkaniyatın beredi.
Usı maqsette Bajıxana komiteti hám Evropa ekonomikalıq komissiyası arasında birge islesiw haqqında memorandumǵa qol qoyıw usınısı alǵa qoyıldı.
Sonday-aq, Ózbekstan bajıxana uyımlarınıń transshegaralıq sawdaǵa baylanıslı málimleme sistemaların “UN/CEFACT” standartları hám usınıslarına muwapıqlastırıw boyınsha birge islesiw “Jol kartası”n islep shıǵıw perspektivaları hár tárepleme kórip shıǵıldı.
Atap ótilgenindey, bul baslamalar regionallıq integraciyanı tereńlestiriw, sonday-aq, sawda tártip-qaǵıydaların ápiwayılastırıw hám jedellestiriwge xızmet etedi.
Ushırasıwda 2025-jılı Ózbekstan bajıxana uyımlarında gender teńlikti támiyinlew baǵdarındaǵı háreketler xalıqaralıq dárejede tán alınǵanı ayrıqsha atap ótildi. Atap aytqanda, Bajıxana komiteti BMSh Rawajlanıw baǵdarlamasınıń (BMShRB) Gender teńligi gúmis belgisi menen sıylıqlandı.
Bul jetiskenlik institucionallıq potencialdı bekkemlew, kadrlar siyasatın rawajlandırıw hám erler menen hayal-qızlar ushın teńdey imkaniyatlar jaratıwǵa qaratılǵan reformalardıń nátiyjeliligin ámelde tastıyıqlaydı.
Tárepler Ózbekstan bajıxana uyımlarında gender teńlikti úgit-násiyatlaw boyınsha xalıqaralıq sherikler menen birgeliktegi jumıslar dawam ettiriletuǵının atap ótti.

Sh.Mamaturopova, ÓzAnıń xabarshısı