Senattıń Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komitetiniń májilisinde Ózbekstan Respublikası Sırtqı isler ministrliginiń 2025-jıldaǵı jumısı boyınsha málimlemesi tıńlandı.
Atap ótiliwinshe, ótken jıl dawamında mámlekettiń sırtqı siyasatın ámelge asırıw boyınsha izbe-iz jumıslar ámelge asırılǵan. Xalıqaralıq birge islesiwdi rawajlandırıw, xalıqaralıq hám regionallıq shólkemler sheńberinde milliy máplerdi jedel alǵa qoyıw, sırt eldegi puqaralarımızdıń huqıqları menen máplerin qorǵaw dıqqat orayında bolǵan.
Sırtqı ekonomikalıq baylanıslardı keńeytiw, sırt el investiciyaları, eksport, turistlerdiń kólemin arttırıw, jańa transport koridorların rawajlandırıw baǵdarında da sistemalı jumıslar alıp barılǵan.
Májiliste Prezidentimizdiń Múrájatnamasında jáne usı jıl 15-yanvar kúni Sırtqı isler ministrligi hám sırt eldegi diplomatiyalıq wákilxanalardıń jumısı máselelerine baǵıshlanǵan videoselektorda qoyılǵan wazıypalardıń orınlanıwın támiyinlew zárúrligine itibar qaratıldı.
Sırtqı baylanıslardı bunnan bılay da rawajlandırıw, milliy máplerdi jedel alǵa qoyıw, ekonomikalıq diplomatiyanı kúsheytiw boyınsha tiykarǵı wazıypalardı óz waqtında orınlaw áhmiyetli ekenligine itibar qaratıldı.
Dúnya kólemindegi quramalı geosiyasiy jaǵdayǵa qaramastan, Prezidentimiz tárepinen belgilengen ashıq, pragmatikalıq hám intaker sırtqı siyasattı izbe-iz ámelge asırıw nátiyjesinde Ózbekstan xalıqaralıq maydanda isenimli hám abıraylı sherik sıpatında óz ornın bekkemlep atırǵanı atap ótildi.
Sonıń ishinde, 2025-jılı 26 sırt mámleketke joqarı dárejedegi saparlar ámelge asırılǵanı, bir qatar mámleket basshılarınıń Ózbekstanǵa saparları shólkemlestirilgeni, “Oraylıq Aziya plyus” formatındaǵı kóp tárepleme sóylesiwler nátiyjeli ótkeni, strategiyalıq sheriklik qatnasıqları ornatılǵan mámleketlerdiń sanı 19, diplomatiyalıq baylanıs ornatılǵan mámleketlerdiń sanı bolsa 165 ke jetkeni atap ótildi.
Senatorlar Ózbekstannıń xalıqaralıq abırayın bunnan bılay da arttırıw, sırtqı ekonomikalıq baylanıslardı rawajlandırıw, puqaralardıń máplerin jedel qorǵaw, sırt el investiciyalarınıń aǵımın arttırıw, mámlekettiń eksport potencialın arttırıwda ámeliy nátiyjelilikke erisiw boyınsha óz usınısların bildirdi.
Dodalaw juwmaqları boyınsha tiyisli qarar qabıl etildi.

N.Abduraimova, ÓzA