Hindstannıń Mumbay qalasında ótkerilgen Aziyanıń eń iri turistlik kórgizbelerinen biri – “OTM Mumbai” sheńberinde Ózbekstan Respublikası Turizm komiteti tárepinen shólkemlestirilgen milliy stend joqarı itibarǵa eristi.
Turizm tarawı mámleket ekonomikası hám mádeniy brendti rawajlandırıwda áhmiyetli rol atqaradı. Sonlıqtan, xalıqaralıq kórgizbelerde belsene qatnasıw hám mámleketimizdi keńnen úgit-násiyatlaw Ózbekstan turizminiń jáhán maydanındaǵı abırayın arttırıwǵa xızmet etedi.
“Fairfest Media Ltd” xalıqaralıq kompaniyası tárepinen ótkerilgen kórgizbe nátiyjelerine bola, Ózbekstan “Eń perspektivalı jańa turistlik baǵdar” (Most Promising New Destination) nominaciyasında jeńimpaz dep tabıldı hám kórgizbe shólkemlestiriwshileri tárepinen beriletuǵın abıraylı “OTM Excellence Award” sıylıǵın qabıl etti.
Bul tán alıw Ózbekstannıń bay mádeniy miyrası, turistlik potencialı hám xalıqaralıq maydandaǵı jedel úgit-násiyatlawdıń jáne bir ayqın dálili bolıp esaplanadı. Milliy stendtiń tabısı Ózbekstan turizmin dúnya bazarında jáne de keńnen úgit-násiyatlaw hám turistler aǵımın arttırıwǵa xızmet etiwi kútilmekte.

Muhayyo Toshqoraeva, ÓzA