2026-jıl Ózbekstan Respublikasında “Máhálleni rawajlandırıw hám jámiyetti ilgeriletiw jılı” dep belgilendi. Bul máhállelerdiń jáne de rawajlanıwına, onda jasap atırǵan xalıqtıń abadan, tınısh hám bir-biri menen tatıwlıqta jasawına xızmet etedi.
Paytaxtımız Nókis qalasında jaylasqan “Jas áwlad” máhállesi de bul tariyxıy jılǵa tayarlıq kóriwde belsene qatnastı. 27,85 gektar maydanda jaylasqan máhállede búgin 1706 shańaraqta 4883 puqara tınısh-tatıw jasap kelmekte. 2025-jıl dawamında máhállede ámelge asırılǵan jumıslar hám erisilgen jetiskenlikler tek ǵana xalıqtıń turmıs dárejesin arttırıp qoymastan, al «Jas áwlad» atına múnásip bolǵan jaslarımız ushın zamanagóy sharayat jarattı.
Máhálleniń eń áhmiyetli jetiskenliklerinen biri óz imaratına iye bolıwı boldı. 2024-jıldıń noyabr ayında ótkerilgen “Baslamalı byudjet” portalında máhálle imaratın qurıw joybarı usınıs etildi hám dawıs beriw basqıshında máhálle turǵınları belsene qatnasıp, joybar jeńimpazǵa aylandı. Nátiyjede mámleketlik byudjet esabınan ajıratılǵan 1 milliard 360 million sum qarjı esabınan zamanagóy hám barlıq sharayatlarǵa iye máhálle imaratı qurılıp, 2025-jılı paydalanıwǵa tapsırıldı. Bul joybar tek ǵana infrastukturanı jaqsılap qoymastan, máhálledegi xalıqtıń awızbirshiliginiń hám belsendiligin de arttırdı.
Máhállede isbilermenlikti rawajlandırıw hám xalıqtı jumıs penen bánt etiw boyınsha da úlken nátiyjelerge erisildi. Jıl dawamında máhálledegi 120 adam jumıs penen támiyinlendi. Sonnan aymaqtaǵı jumıssız 80 puqaraǵa ulıwmalıq esapta 1 milliard sumǵa shamalas jeńilletilgen kredit ajratıldı. Bul arqalı puqaralardıń óz ideyaların hám baslamaların turmısqa engiziwde járdem berildi.
Nátiyjede, barlıq kredit alıwshılar óz isbilermenligin jolǵa qoyıp, házirde jumısların keńeytip, jeke dáramatlarına iye boldı hám shańaraqlarına dáramat kirgizbekte.
Jumıssız hayal-qızlardı kásipke baǵdarlaw, olardıń bos waqıtların mazmunlı ótkeriw maqsetinde “Ishga marhamat” monooraylarında, Sawda-sanaat palatasındaǵı isbilermenlikke kómeklesiw orayları, sonday-aq, hayal-qızlar isbilermenlik oraylarında oqıwı ushın jollamalar berildi.
Nátiyjede máhállemizdegi jumıssız 105 hayal-qız zamanagóy hám házirgi kúnde talap joqarı bolǵan kásiplerge oqıtılıp, tigiwshilik, kompyuter sawatlılıǵı, aspazlıq, gózzallıq salonı, hayal-qızlar hám balalar massaj qánigesi, balalar tárbiyashısı tarawları boyınsha jumıs islep, óz dárámatın arttırmaqta.
“Jas áwlad” mákán puxaralar jıyınında jaslar arasında sport hám salamat turmıs tárizin rawajlandırıw boyınsha da kólemli jumıslar ámelge asırıldı.
Ásirese, máhálle jaslarınan biri Ayna Qurbaniyazova “Bes baslama olimpiadası” sheńberinde ótkerilgen sporttıń para shashka túri boyınsha Ózbekstan Respublikası basqıshında 1-orındı iyelep, máhállelesleriniń perzentleri sport penen shuǵıllanıwı ushın universal sport maydanshasın qurıw imkaniyatın jeńip aldı. Máhálle jaslarınıń biri Qoblan Kamalov 2025-jılı Aziya chempionatında qılıshlasıw sportınıń shpaga túrinen jeke hám komandalıq esapta jeńimpaz bolıwǵa eristi.
Bunday jaslarımızdıń jeńisleri tek ǵana jeke jetiskenlik emes máhálle xalqı ushın da quwanıshlı jańalıq boldı.
Joqarıdaǵılar máhálledegi jetiskenliklerdiń kishkene bir bólegi hám baslanıwı, 2026-jıl – “Máhálleni rawajlandırıw hám jámiyetti ilgeriletiw” jılında “Jas áwlad” máhállesi jáne de abat, zamanagóy hám shıraylı mákánǵa aylanatuǵını anıq.

Bibisanem Joldasbaeva,
Berdaq atındaǵı QMU dıń 2-kurs magistrantı.
Qaraqalpaqstan xabar agentligi.