Berdaq atındaǵı Qaraqalpaq mámleketlik akademiyalıq muzıkalı teatrı hám Ázerbayjan mámleketlik akademiyalıq muzıkalı teatrı arasında birge islesiw memorandumına qol qoyıldı.
Memorandumda teatr tarawında tájiriybe almasıw, qospa spektakllerdi saxnalastırıw, gastrol saparları, festivallar hám dóretiwshilik ushırasıwlardı shólkemlestiriw názerde tutılǵan.
Bul kelisim eki teatr jámáátleri arasında jańa dóretiwshilik kózqaraslardı ashıp, qospa saxna joybarların ámelge asıradı.
Bul iygilikli baslamalardıń ámeliy kórinisi sıpatında usı jıldıń sentyabr ayında Berdaq atındaǵı Qaraqalpaq mámleketlik akademiyalıq teatrınıń 100 jıllıq yubileyi múnásibeti menen Ázerbayjan mámleketlik akademiyalıq muzıkalı teatrı Nókis qalasına keledi. Miymanlardıń hám tamashagóylerdiń itibarına Berdaq atındaǵı Qaraqalpaq mámleketlik akademiyalıq muzıkalı teatrı jámááti menen birge belgili “Arshın mal alan” spektaklin usınadı.
Ásirge teń tariyxqa iye saxna bayramı kórkem óner ıqlasbentleri ushın umıtılmas máwritlerge bay bolatuǵını sózsiz. Bul dóretiwshilik ushırasıw eki xalıq arasındaǵı doslıq baylanısların jáne de bekkemlep, teatr kórkem ónerine jańa ruwx hám ilham baǵıshlaydı.

Á.Jiyemuratov,
Qaraqalpaqstan xabar agentligi