Ózbekstan Respublikası awıl xojalıǵı ministri Ibrohim Abdurahmonov UNESCO janındaǵı Jáhán ilimler akademiyası (TWAS) atqarıwshı direktorı Marselo Knobel menen ushırastı.
Ushırasıw dawamında agrar tarawda ilim hám bilimlendiriwdi únles rawajlandırıw, sonday-aq, xalıqaralıq birge islesiwdi keńeytiw máseleleri dodalandı.
Sóylesiw aldınan ministr Ózbekstanda agrar baǵdarda ámelge asırılıp atırǵan ilimiy izertlewler, bilimlendiriw sistemasında alıp barılıp atırǵan reformalar haqqında maǵlıwmat berdi. Atap aytqanda, zamanagóy agrar bilimlendiriw talaplarına sáykes, insanıylıq principlerine tiykarlanǵan oqıw-tárbiyalıq kózqarasları, sonıń ishinde, HECI principleriniń basqıshpa-basqısh engizilip atırǵanı ayrıqsha atap ótildi.
Sóylesiw procesinde Jáhán ilimler akademiyası (TWAS) hám Ózbekstannıń agrar baǵdardaǵı ilimiy hám bilimlendiriw mákemeleri arasında birge islesiw baylanısların rawajlandırıw, birgeliktegi ilimiy joybarlardı ámelge asırıw, sonday-aq, qánigeler almasıwın jolǵa qoyıw boyınsha bir qatar usınıslar kórip shıǵıldı.
Tárepler bul baslamalar agrar tarawda ilimiy potencialdı arttırıw, maman kadrlar tayarlaw sapasın jańa basqıshqa alıp shıǵıwǵa xızmet etetuǵının atap ótti.
Ushırasıw juwmaǵında tárepler óz-ara paydalı birge islesiwdi jolǵa qoyıw hám onı izbe-iz rawajlandırıw boyınsha kelisimge erisip, keleshekte anıq baǵdarlar tiykarında birge islesiwdi jáne de tereńlestiriwge tayar ekenligin bildirdi.

Muhayyo Toshqoraeva,
ÓzAnıń xabarshısı