Iran yadrolıq kelisim boyınsha sankciyalar biykar etilse, uran rezervlerin qısqartıwǵa tayar ekenin bildirdi. Liviya jaǵalıqlarında migrantlar qayıǵı apatshılıqqa ushırap, onlaǵan insanlar qaytıs boldı. Qubla Koreyada demografiyalıq mashqalalardı sheshiw boyınsha tartıslı usınıs jámiyetshiliktiń narazılıǵına sebep boldı. Rossiyada miynet migrantlarına jańa sheklewler rejelestirilmekte. Kubada janılǵı jetispewshiligi sebepli aviaqatnawlar izden shıqtı. CHechenstanda tarqalǵan feyk xabarlardıń dodalanıwı hám Túrkiyanıń yadrolıq qáwip haqqındaǵı eskertiwi – hámmesi usı videoda.
Iran xalıqaralıq sankciyalar biykar etilse, joqarı dárejede bayıtılǵan uran rezervlerin qısqartıwǵa tayar ekenin málim etti. Iran Atom energiyası shólkemi basshısı Muhammad Islomiydiń atap ótiwinshe, 60 procentke shekem bayıtılǵan uran muǵdarın azaytıw tek ǵana barlıq sheklewler alıp taslanǵan jaǵdayda ǵana múmkin. MAGATE esabatına bola bolsa, bar rezervler 90 procentke jetkerilse, toǵız yadrolıq qural jaratıw ushın jeterli boladı. Batıs mámleketleri bul jaǵdaydı qáweterleniw menen baqlamaqta, tárepler bolsa sóylesiwlerdi dawam ettiriwge kelisip alǵan.
Liviya jaǵalıqları janında migrantlar bolǵan rezina qayıq awdarılıp, 53 adam qaytıs boldı. Qayıqta jámi 55 adam bolǵan bolıp, tek eki hayal aman qalǵan. Onda Afrikanıń túrli mámleketlerinen shıqqan qashqınlar hám migrantlar Evropaǵa jetip alıwǵa urınıp atırǵan edi. BMSh maǵlıwmatlarına bola, 2026-jıldıń basınan berli Jer Orta teńizi arqalı ótiw waqtında júzlegen insanlar qaytıs bolǵan yamasa biydárek joǵalǵan.
Qubla Koreyada bolsa tuwılıw dárejesin arttırıw maqsetinde shet elli hayal-qızlardı tartıw usınısı úlken tartıslarǵa sebep boldı. Jindo okruginiń basshısı jas hayallardı Vetnam yamasa Shri-Lankadan alıp kelip, awıllıq aymaqlardaǵı erkeklerge turmısqa beriwdi usınıs etken. Bul bayanat jámiyetshiliktiń narazılıǵına sebep bolıp, diplomatiyalıq narazılıqlardan keyin rásmiyler keshirim sorawǵa májbúr boldı.
Rossiya húkimeti miynet migrantlarınıń shańaraq aǵzaların mámleketke alıp keliw tártibin keskinlestiriwdi rejelestirmekte. Jańa nızam joybarına bola, hár bir shańaraq aǵzası ushın jeterli dáramat bar ekenligi tastıyıqlanıwı, sonday-aq, balalar ushın salıq tólemleriniń ámelge asırılıwı talap etiledi. Belgilengen normalarǵa ámel etilmegen jaǵdaylarda migrantlardıń jasaw ruqsatnamaları biykar etiliwi múmkin.
Kubada aviaciya janılǵısı jetispewshiligi párwazlar kestesine ayrıqsha tásir etpekte. Gavana aeroportında sırt el aviakompaniyalarına janılǵı quyıw waqtınsha toqtatılǵan. Ayırım reysler biykar etilgen bolıp, mıńlaǵan turistler atawda qalıp ketken. Rásmiyler krizis AQSh tárepinen engizilgen jańa basım ilajları menen baylanıslı ekenin bildirmekte.
CHechenstan basshısı Ramzan Qodirov balası menen baylanıslı jol-transport hádiysesi haqqında tarqalǵan xabarlardı biykarladı. Ol bul maǵlıwmatlardı feyk dep atap, jasalma intellekt arqalı jalǵan málimleme tarqatıw ańsatlasıp atırǵanın atap ótti hám kiberjınayatlarǵa qarsı gúresiw kúsheytiletuǵının málim etti.
Túrkiya sırtqı isler ministri Hakan Fidan bolsa regionda yadrolıq quralǵa iye mámleketler sanı artıp barsa, Ankara da bunday jarısta qatnasıwǵa májbúr bolıwı múmkin ekenligin bildirdi. Ol ayırım mámleketlerdiń yadrolıq imkaniyatlardı arttırıwǵa urınıwı pútkil aymaq ushın úlken qáwip tuwdıratuǵının atap ótti.

Qaraqalpaqstan xabar agentligi