Ózbekstanda radioaktiv shıǵındılar menen qáwipsiz hám nátiyjeli islesiw sistemasın jetilistiriw, bul tarawda birden-bir mámleketlik xızmetti jolǵa qoyıw maqsetinde 2026-jıl 9-fevralda Húkimettiń “Respublikalıq radioaktiv shıǵındılardı saqlaw orayınıń jumısın shólkemlestiriw haqqında”ǵı qararı qabıl etildi.
Qararǵa muwapıq, Yadro fizikası institutı janında jumıs alıp barǵan Respublikalıq radioaktiv shıǵındılardı kómiw punkti tiykarında Respublikalıq radioaktiv shıǵındılardı saqlaw orayı shólkemlestiriledi.
Oray respublika aymaǵındaǵı radioaktiv shıǵındılardı arnawlı avtotransport qurallarında tasıw, qabıl etiw, saylap alıw hám olardı uzaq múddetli qáwipsiz saqlaw boyınsha birden-bir mámleketlik mákeme sıpatında belgilendi.
Húkimet qararında Oraydıń tiykarǵı wazıypaları anıq belgilep berildi. Sonıń ishinde, respublikada islep shıǵarılǵan yamasa alıp kelingen, islew múddeti tamamlanǵan yamasa isten shıqqan radioaktiv derekler menen islesiw procesinde payda bolǵan radioaktiv shıǵındılardı tańlap alıw, qayta islew hám uzaq múddetli saqlaw názerde tutılǵan.
Sonday-aq, radioaktiv shıǵındılar menen islesiwdiń innovaciyalıq usılların islep shıǵıw, bul baǵdarda ilimiy izertlewler alıp barıw, tarawda sanlastırıw hám zamanagóy málimleme texnologiyaların engiziw jáne tiyisli mámleketlik uyımlar menen nátiyjeli málimleme almasıwın támiyinlew Oraydıń áhmiyetli wazıypaları qatarına kiredi.
Qarar radioaktiv shıǵındılar menen islesiw tarawında qáwipsizlikti arttırıw, qorshaǵan ortalıq hám xalıqtıń salamatlıǵın qorǵawǵa qaratılǵan kompleksli ilajlardı ámelge asırıwǵa xızmet etedi.

Hamroz Bayanov, ÓzAnıń xabarshısı