Mámleketlik qáwipsizlik xızmeti shegara áskerlerine qaraslı áskeriy bólimlerdiń birinde múddetli áskeriy xızmetti ótep atırǵan áskerlerdiń joqarı oqıw orınlarına kiriwde jeńillik beretuǵın usınıstı qolǵa kirgiziwi ushın test sınaqları ótkerildi.
Bilim hám mamanlıqlardı bahalaw agentliginiń Qaraqalpaqstan Respublikası bóliminde Ózbekstan Respublikası Prezidentiniń “Ózbekstan Respublikası Qurallı Kúshleri qatarında múddetli áskeriy xızmetti ótep bolǵan puqaralarǵa jeńillikler sistemasın jetilistiriwge baylanıslı qosımsha ilajlar haqqında”ǵı qararınıń orınlanıwın támiyinlew maqsetinde shólkemlestirilgen bul ilajda júzlegen áskerler qatnastı.
Test sınaqlarında hár bir ásker óz bilimin jáne bir márte sınaqtan ótkerdi. Sınaqlar dawamında áskerlerdiń jawıngerlik tayarlıǵı, jámiyetlik-siyasiy bilimleri hám logikalıq pikirlewine ayrıqsha itibar qaratıldı.
– Búgin men de birge xızmet ótegen doslarım menen birgelikte jeńilletilgen usınısnama alıw ushın test sınaqlarına qatnastım, – deydi áskeriy xızmetker L.Jwraev.
Usınıs xatın qolǵa kirgizgennen soń, elimizdegi abıraylı joqarı oqıw orınlarınıń birine kirip, elimizdiń rawajlanıwına úles qosatuǵın kadr bolmaqshıman.
Test sınaqlarında joqarı nátiyje kórsetken áskerler MQX shegara áskerleri sárkardalıǵınıń usınısına ılayıq dep tabıladı. Bul hújjet jigitler ushın keleshek esigin ashıp, áskeriy joqarı oqıw orınları ushın da respublikanıń joqarı áskeriy bilimlendiriw mákemelerine oqıwǵa kiriwde toplaǵan ballarınıń 50 procenti muǵdarında qosımsha ball usınıladı.
Al, puqaralıq joqarı oqıw orınları ushın barlıq mámleketlik joqarı bilimlendiriw mákemeleriniń bakalavriatına qabıllaw parametrlerinen tısqarı ajıratılǵan ayrıqsha kvotalar sheńberinde tańlawda qatnasıw huqıqın beredi.
Ótkerilgen test processleri tolıq videobaqlaw astında, ashıq-aydın tárizde shólkemlestirildi.

Qaraqalpaqstan xabar agentligi