Berdaq atındaǵı Qaraqalpaq ádebiyatı tariyxı mámleketlik muzeyinde Qaraqalpaqstan xalıq shayırı Bayniyaz Qayıpnazarovtıń 110 jıllıǵına baǵıshlanǵan “Gúllerge shayda bolǵan shayır” atamasında ádebiy keshe ótkerildi.
Onda universitettiń professor–oqıtıwshıları, student-jaslar hám licey oqıwshıları qatnasıp, B.Qayıpnazarovtıń ómiri hám dóretiwshilik jumısları tuwralı bahalı maǵlıwmatlar berildi.
Atap ótilgenindey, B.Qayıpnazarov 1916-jılı Shımbay rayonında tuwılǵan. Ol 1939-jılı Tórtkúldegi muǵallimler institutın pitkerip, 1939-1941-jılları awılda muǵallim, 1941-1944-jılları ekinshi dúnya júzilik urısta boladı.
Urıstan qaytıp kelip, 1944-1946-jılları muǵallimlik jumısın dawam etedi. 1951-1956-jılları Moskvadaǵı ádebiyat institutın pitkergennen soń “Ámiwdárya” jurnalınıń bas redaktorı, bólim baslıǵı, húrmetli dem alısqa shıǵaman degenshe “Qaraqalpaqstan” baspasında aǵa redaktor bolıp jumıs islegen.
B.Qayıpnazarovtıń «Qosıqlar» (1940), «Xalıqqa xızmet qılaman» (1942), «Kók emen” (1956), “Qızıl gúl” (1958), «Altın gúz» (1959), “Súy dostım” (1962), “Meniń baxtım” (1966), “Eki ayaz” (1970), “Nárwan” (1972), “Gúldáste” (1981), “Men seniń bir shaqańman” (1977) hám basqa da otızǵa shamalas poeziyalıq toplamları hám shıǵarmalarınıń jıynaǵı bir neshe márte qaraqalpaq, rus, ózbek tillerinde basılıp shıqtı.
B.Qayıpnazarov birinshi dárejeli “Watandarlıq urıs ordeni” hám medalı, Qaraqalpaqstan Respublikası Joqarı Keńesiniń Húrmet jarlıqları, “Qaraqalpaqstan xalıq shayırı” húrmetli ataqlarına iye edi.
Ilajda B.Qayıpnazarovtıń nama qosıqlarınan atqarılıp, jaslar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi