Elimizde jergilikli óndiristi qollap-quwatlaw, sanaat kooperaciyasın jańa sistema tiykarında rawajlandırıw hám mámleketlik satıp alıwlardıń nátiyjeliligin arttırıwǵa qaratılǵan izbe-iz reformalar alıp barılmaqta.
Atap aytqanda, Prezidentimizdiń usı jıl 4-fevralda “Jergilikli óndiris hám sanaat kooperaciyasın jańa sistema tiykarında rawajlandırıw boyınsha birinshi gezektegi ilajlar haqqında”ǵı pármanı qabıl etildi.
Pármanǵa bola, Sanaat kooperaciyası hám mámleketlik satıp alıwlar agentligi, Sanaat kooperaciyası hám mámleketlik satıp alıwlar agentligi basqarıw keńesi shólkemlestiriledi. Ekonomika hám qarjı ministrliginiń mámleketlik satıp alıwlar tarawındaǵı wazıypa, funkciya hám wákillikleri Agentlikke ótkeriledi.
2026-jıl 1-iyulden baslap, Agentlik respublika hám region bazarın tallap, milliy ekonomikaǵa qosılatuǵın qun shınjırların arttırıwǵa xızmet etetuǵın ózlestiriw usınıs etiletuǵın básekige shıdamlı ónimlerdiń dizimin tarawlar kesiminde basqıshpa-basqısh qáliplestiredi hám járiyalap baradı.
Ózlestiriw usınıs etiletuǵın básekige shıdamlı ónimler dizimine kirgizilgen ónimlerdi ózlestirgen isbilermenler menen belgilengen tártipte kepillikli satıp alıw shártnamaları dúziledi.
Isbilermenlik subektleriniń turaqlılıq reytingin qáliplestiriwde ónimlerdi islep shıǵarıwda jaratılǵan qosımsha qun úlesi qosımsha ball beretuǵın kórsetkishlerge kirgiziledi.
Pármanǵa bola, 2027-jıl 1-yanvardan, kishi hám orta isbilermenlik subektleriniń mámleketlik satıp alıwlardaǵı qatnasın keńeytiw maqsetinde mámleketlik satıp alıwlarda satıp alıw predmetin texnologiyalıq shınjırlar, funkcionallıq basqıshlar hám jumıs túrleri kesiminde ayrıqsha lotlarǵa bóliw ámeliyatı engiziledi.
Korporativ buyırtpashılarda “professional qarıydar” sertifikatına iye qánigeler bolmaǵan jaǵdayda, 2028-jıl 1-yanvardan baslap olar mámleketlik satıp alıwlarda qatnasıwı qadaǵan etiledi.
Sonday-aq, 2026-jıl 1-iyulden dáldalshı-broker hám (yamasa) dilerlerge islep shıǵarıwshılar menen shártnama dúziw arqalı olar tárepinen islep shıǵarılǵan ónimlerdi mámleketlik satıp alıwlarda satıw huqıqı beriledi.
2026-jıl 1-aprelden baslap byudjet buyırtpashılarınıń mámleketlik satıp alıwları sheńberinde sırt elli jetkerip beriwshiler menen bir qatarda jergilikli islep shıǵarıwshılar qatnasqanda olarǵa usınıs etilgen eń tómen import tovarlardıń bahasınan tómendegi muǵdarlarda baha preferenciyası beriledi. 3 hám onnan artıq jergilikli islep shıǵarıwshı qatnasqan jaǵdayda 15 procent, 2 jergilikli islep shıǵarıwshı qatnasqan jaǵdayda 12 procent, 1 jergilikli islep shıǵarıwshı qatnasqan jaǵdayda 8 procent muǵdarında preferenciya beriledi.
Pármanǵa bola, 2026-jıl 1-sentyabrden mámleketlik satıp alıwlar arnawlı málimleme portalında satıp alıw tártip-qaǵıydaları qatnasıwshısınıń jumısın uyımlararalıq málimleme almasıwı arqalı avtomat túrde bahalaw imkaniyatın beretuǵın elektron-skoring sisteması iske qosıladı.
Onda elektron-skoring sisteması járdeminde qatnasıwshılardıń mámleketlik satıp alıwlardaǵı “joqarı”, “ortasha”, “tómen” hám “eń tómen” isenimlilik dárejeleri beriledi.
Joqarıdaǵılar tiykarında tómendegi qollap-quwatlaw ilajları kóriledi. Atap aytqanda, “joqarı” isenim dárejesine iye qatnasıwshılar ushın girew tólew talap etilmeydi. Eń jaqsı usınıslardı tańlap alıw hám tender sawdalarında qatnasıwshılar tárepinen usınılǵan usınıslarǵa isenimlilik dárejesine sáykes túrde qosımsha ball beriledi.
Mámleketlik satıp alıwlar tarawında “eń belsendi isbilermen” tańlawında mámleketlik satıp alıwlardaǵı isenimlilik dárejesi “joqarı” bolǵan mámleketlik satıp alıwlar qatnasıwshılarınıń talabanları qollap-quwatlanadı.
Sonday-aq, mámleketlik satıp alıwlardaǵı isenimlilik dárejesi “tómen” hám “eń tómen” bolǵan qatnasıwshılardıń satıp alıw tártip-qaǵıydalarında qatnasıwına ruqsat beriletuǵın mámleketlik satıp alıwlardıń joqarı bahasına salıstırǵanda normalar belgilenedi.
Biypul onlayn oqıw kursları arqalı mamanlıǵın arttırıw ámeliyatı jolǵa qoyıladı.

Sh.Mamaturopova, ÓzA