Ózbekstan Respublikası Prezidenti Shavkat Mirziyoev 10-fevral kúni Aziya infrastrukturalıq investiciyalar bankiniń prezidenti Czou Czyai basshılıǵındaǵı delegaciyanı qabılladı.
Ushırasıw aldınan mámleketimiz jetekshisi usı abıraylı kóp tárepleme qarjı institutınıń basshısın lawazımǵa kiriskeni menen qızǵın qutlıqladı.
Ózbekstannıń Aziya infrastrukturalıq investiciyalar banki menen strategiyalıq sherikligin keńeytiwdiń ámeliy máseleleri hár tárepleme dodalandı.
Sońǵı jıllarda bank penen kóp tárepleme birge islesiw jedel rawajlanbaqta. Ámeldegi hám perspektivalı birgeliktegi joybarlar portfeli 7 milliard dollardan arttı. Ótken jıldıń ózinde qarjılandırıw kólemi 1 milliard dollardan aslamdı quradı.
Ózbekstan Prezidenti jeke menshik sektor, hayal-qızlar hám jaslar isbilermenligin qollap-quwatlaw, mámleketlik-jeke menshik sheriklik joybarların islep shıǵıw hám alǵa qoyıw, kámbaǵallıqtı qısqartıw baǵdarlamasın ámelge asırıwǵa járdemlesiw, alternativ energetika, energiya nátiyjeliligi, suw támiynatı, sociallıq xızmetti rawajlandırıw sıyaqlı áhmiyetli tarawlarda nátiyjeli birge islesiwdi keńeytiw zárúr ekenligin atap ótti.
AIIBniń regionallıq áhmiyetke iye iri infrastrukturalıq joybarlarda belsene qatnasıwı áhmiyetli ekenligi atap ótildi.
Óz gezeginde, Czou Czyai mámleketimizdegi ózgerislerdiń kólemin joqarı bahalap, Jańa Ózbekstanda ámelge asırılıp atırǵan reformalar baǵdarlamasın hár tárepleme qollap-quwatlawdı dawam ettiriwge tayar ekenin bildirdi.

ÓzA