Ózbekstan mámleketlik denetárbiyası hám sport universiteti Nókis filialı Ózbekstan Jeńil atletika federaciyası Qaraqalpaqstan bólimi menen birgelikte filial professor-oqıtıwshıları hám studentleri ushın ilimiy-ámeliy seminar shólkemlestirdi.
Seminardı filial direktorı, professor Bayrambay Erimbetov kiris sóz benen ashtı hám basqarıp bardı.
Onda Ózbekstan Jeńil atletika federaciyası baslıǵınıń orınbasarı, pedagogika ilimleriniń doktorı, professor Nizomjon Twxtaboev Prezident olimpiadası, xalıqaralıq sport jarısları, olimpiada hám paralimpiada oyınları, Jáhán chempionatı hám kubogi, Ózbekstan chempionatı hám kubogi jarıslarında sportshılardıń qatnasıwı boyınsha kórsetpe hám usınısların berdi.
Bunnan soń Rossiya Federaciyasınan kelgen «Rossiyada xızmet kórsetken trener» Nikolay Kolodko jeńil atletikanıń yadro ılaqtırıw túrlerin rawajlandırıw boyınsha zamanagóy metodikaları haqqında, «Rossiyada xızmet kórsetken trener», xalıqaralıq dárejedegi sport sheberi Sergey Dementev jeńil atletikanıń qısqa aralıqqa juwırıw túrlerin rawajlandırıwdıń zamanagóy usılları degen atamada bayanat jasadı.
Ótkerilgen ilimiy-ámeliy seminar óziniń áhmiyetliligi menen qatnasıwshılardı qızıǵıwshılıq oyattı.

Adilbay Orazov,
Qaraqalpaqstan xabar agentligi sholıwshısı