Amerikalı milliarder Ilon Mask kútilmegen bayanat penen shıqtı. “SpaceX” endi tiykarǵı itibardı Marsqa emes, al Ayda “keńeyip baratuǵın qala” qurıwǵa qaratadı. Onıń aytıwınsha, bunday joybar 10 jıldan az waqıt ishinde ámelge asırılıwı múmkin.
– Marstaǵı qala ármanı biykar etilmedi. Ol 5-7 jıl ishinde qayta baslanıwı múmkin. Házirshe tiykarǵı wazıypa basqasha: civilizaciya keleshegin kepillew ushın Ay tezirek hám reallıqqa jaqın, – dep jazdı Mask “X” platformasında.
Kompaniya 2027-jıl martta ushıwshısız samolyot arqalı Ayǵa qonıwdı maqset etken. Bul burılıs fonında AQSh hám Qıtay arasındaǵı Ay “jarısı” da keskinlespekte. Adamzat 1972-jıldaǵı “Apollo 17” missiyasınan berli Ayǵa jeterli dárejede barıp kórmegen. “SpaceX”tiń bul maqseti Vashington ushın strategiyalıq áhmiyetke iye.
Qızıǵı sonda, Mask jaqında ózi basshılıq etip atırǵan “xAI”dı “SpaceX” penen birlestirgenin járiyaladı. Bul qádem kosmosta energiyanı únemleytuǵın maǵlıwmat orayların qurıw rejeleri menen túsindirilip atır.
Mask sonday-aq, basqa bizneslerin de qayta kórip shıqpaqta: “Tesla” bıyıl 20 milliard dollardı “Optimus” robotlarına qaratadı, bunıń ushın Kaliforniyadaǵı zavodta eki modeldi islep shıǵarıw toqtatıladı.

Musulmon Ziyo, ÓzA