Ózbekstanda texnikalıq tártipke salıw, standartlastırıw, muwapıqlıqtı bahalaw hám metrologiya tarawlarında ámelge asırılıp atırǵan reformalar xalıqaralıq kólemde, sonıń ishinde, Evropa mámleketleri tárepinen unamlı bahalanbaqta.
Keyingi jılları bul baǵdarlarda sistemalı reformalar ámelge asırılıp, tarawdı modernizaciyalaw, milliy standartlardı xalıqaralıq hám Evropa standartlarına beyimlestiriw, sonday-aq, sapa infrastrukturasın rawajlandırıwǵa ayrıqsha itibar qaratıldı. Evropa Awqamınıń institutları hám xalıqaralıq shólkemler menen birge islesiw izbe-iz jolǵa qoyılıp, tájiriybe almasıw, texnikalıq járdem kórsetiw hám birgeliktegi joybarlardı ámelge asırıw nátiyjeli tús almaqta.
Ásirese, ónim hám xızmetlerdiń sapasın arttırıw, eksport potencialın keńeytiw, tutınıwshılardıń huqıqların qorǵaw hám bazar qadaǵalawı mexanizmlerin jetilistiriw boyınsha erisilip atırǵan nátiyjeler Evropa ekspertleri tárepinen tán alınbaqta. Muwapıqlıqtı bahalaw uyımlarınıń jumısın xalıqaralıq talaplarǵa beyimlestiriw, laboratoriyalardı akkreditaciyalaw hám metrologiyalıq qadaǵalawdı kúsheytiw arqalı mámlekettiń texnikalıq infrastrukturası sapa jaǵınan jańa basqıshqa kóterilip atırǵanı atap ótilmekte.
Bul reformalar Ózbekstannıń xalıqaralıq sawda sistemasındaǵı ornın bekkemlew, Evropa bazarlarına shıǵıw imkaniyatların keńeytiw hám investiciyalıq tartımlılıqtı arttırıwǵa xızmet etpekte.

ÓzA