Ámiwdárya rayonı CHaykól awılında “Noǵay Iyshan baba” jome meshiti jańa imaratınıń qurılısı tolıq juwmaqlanıp, saltanatlı túrde paydalanıwǵa tapsırıldı.
Bul muqaddes orınnıń ashılıw máresimi kóterińki ruwxta ótkerilip, onda Qaraqalpaqstan Respublikası Ministrler Keńesi Baslıǵınıń orınbasarı Alisher Allaniyazov, Qaraqalpaqstan Musılmanları qazıyatınıń qazısı Bahramaddin Razov, Ámiwdárya rayonınıń hákimi Sabır Xojametov, hákim orınbasarları, nuranıylar, máhálle belsendileri hám keń jámiyetshilik wákilleri qatnastı.
Ilajda shıǵıp sóylegenler elimizde áyyemnen dawam etip kiyatırǵan «háser» dástúri, xalıqtıń awızbirshiligi hám saqawatınıń jámiyetlik turmıstaǵı ornı haqqında ayrıqsha atap ótip, bul iygilikli iske óz úlesin qosqan qurılısshılar, qáwenderler hám máhálle belsendileriniń pidákerlik miynetin joqarı bahaladı.
Sonday-aq, jańa meshit imaratınıń qurılısında jankúyerlik hám intakerlik kórsetken bir topar puqaralar minnetdarshılıq xatları hám estelik sawǵaları menen sıylıqlandı.
Usı dóretiwshilik jumıslar CHaykól awılı xalqınıń birligi, iymanı hám keleshekke bolǵan iseniminiń ayqın úlgisine aylandı. Jańa meshit imaratı watanlaslarımız ushın tek ǵana ibadat ornı emes, al, ruwxıylıq hám tatıwlıq orayı bolıp xızmet etetuǵınına gúman joq.
Ilaj sońında muqaddes Quranı kárim oqılıp, elimiz tınıshlıǵı, xalqımız abadanlıǵı hám ámelge asırılıp atırǵan barlıq iygilikli jumıslardıń dawamlı bolıwın tilep pátiya etildi.

Qaraqalpaqstan xabar agentligi