Ózbekstanda mámleketlik sociallıq qamsızlandırıw sistemasın basqıshpa-basqısh rawajlandırıw hám jumıstan bosaw napaqasın Sociallıq qamsızlandırıw qorı arqalı tólew mexanizmlerin engiziwge ayrıqsha itibar qaratılmaqta.
Usı maqsette mámleketimiz qánigelerinen ibarat delegaciya xalıqaralıq tájiriybeni úyreniw hám sistemanı jetilistiriw ushın Malayziyaǵa bardı.
Delegaciya quramına Sociallıq qorǵaw milliy agentligi, onıń janındaǵı Mámleketlik sociallıq qamsızlandırıw qorı hám Kámbaǵallıqtı qısqartıw hám bántlik ministrliginiń wákilleri kirgizildi. Sapar Aziya rawajlanıw banki menen birgelikte shólkemlestirildi.
Sapardıń birinshi kúni Malayziyada mámleketlik sociallıq qamsızlandırıw hám jumıstı joyıtqan jaǵdayda qamsızlandırıw sistemasınıń institucionallıq strukturası, basqarıw ámeliyatı hám ámeliy mexanizmlerin úyreniwge baǵıshlandı.
Malayziya Insan resursları ministrligi, Sociallıq qorǵaw shólkemi (PERKESO), Ekonomika hám Qarjı ministrlikleri, Insan resursların rawajlandırıw korporaciyası jáne basqa da tiyisli uyım hám shólkemlerdiń wákilleri menen ushırasıwlar ótkerildi.
Sóylesiw dawamında mámleketlik siyasattı qáliplestiriw, qamsızlandırıw tólemlerin adminstraciyalaw hám tólemlerdi ámelge asırıwda wákilliklerdi anıq bólistiriw máseleleri dodalandı.
Sonday-aq, jumıstan bosatıw jaǵdayında sociallıq qamsızlandırıwdıń puqaralardıń dáramatların qorǵawdaǵı roli ayrıqsha atap ótildi.
Malayziya tájiriybesi Ózbekstanda “Mámleketlik sociallıq qamsızlandırıw haqqında”ǵı nızamnıń úshinshi basqıshın ámelge asırıwda qollanılıwı rejelestirilmekte. Atap aytqanda, jumıstan bosatılǵan jaǵdayda napaqalardı Sociallıq qamsızlandırıw qorı arqalı tólew sistemasında finanslıq turaqlılıq, sociallıq ádillik hám rásmiy bántlikti xoshametlew principleri esapqa alınadı.
Sapar sheńberinde alınǵan xalıqaralıq tájiriybe mámleketlik sociallıq qamsızlandırıw sistemasın jetilistiriw hám napaqalardı óz waqtında hám ádil túrde tólewde qollanıladı. Sonıń menen birge, sistemanıń institucionallıq strukturası hám basqarıw ámeliyatın jetilistiriw arqalı puqaralardıń sociallıq qorǵalıwın bekkemlew imkaniyatları jaratılmaqta.

Muhayyo Toshqoraeva, ÓzA