BMSh Ózbekstannıń eń áhmiyetli xalıqaralıq sheriklerinen biri bolıp esaplanadı. Bul shólkemniń bir qatar strukturalıq dúzilmeleriniń, atap aytqanda, Rawajlanıw baǵdarlamasınıń járdeminde kóplegen joybarlar ámelge asırılmaqta.
Sonıń ishinde, densawlıqtı saqlaw baǵdarında izbe-iz baylanıslar jolǵa qoyılǵan bolıp, házirgi waqıtta Ózbekstan Respublikası Densawlıqtı saqlaw kodeksiniń joybarı birgelikte islep shıǵılmaqta.
Densawlıqtı saqlaw ministrligi baspasóz xızmetiniń xabar beriwinshe, ministr A.Xudoyorov hám BMSh Rawajlanıw baǵdarlamasınıń Ózbekstandaǵı wákilxanasınıń turaqlı wákili A.Fudziiy ushırasıwında áne usı másele hár tárepleme kórip shıǵıldı.
Atap ótilgenindey, sońǵı jılları elimizdiń densawlıqtı saqlaw sistemasında úlken ózgerisler hám jańalıqlar júz bermekte. Sonıń ishinde, xalıqtıń salamatlıǵın támiyinlew, keselliklerdiń aldın alıw hám emlew jumıslarına qaratılǵan huqıqıy tiykarlardı birden-bir sistemaǵa birlestiriw baǵdarındaǵı háreketler izbe-iz dawam ettirilmekte.
Usı maqsette Densawlıqtı saqlaw kodeksiniń joybarı bir neshe rawajlanǵan mámleketlerdiń tájiriybesi tiykarında islep shıǵılmaqta. Áhmiyetlisi, ótken dáwirde bul boyınsha bir qansha jumıslar orınlandı. Házirgi waqıtta tarawǵa baylanıslı nızam hújjetlerin muwapıqlastırıw dawam ettirilmekte. Bul bolsa aqırında túrli nızamlardaǵı normalardı birden-bir hújjette jámlew hám eskirgenlerinen waz keshiw imkaniyatın beredi.
Kodeks joybarına xalıqaralıq nızamshılıq talaplarına sáykes keletuǵın bir qatar normalar da kirgizilmekte.
Májiliste processti jáne de jedellestiriw maqsetinde juwapker jumısshı topar dúzilgeni málim etildi hám bul struktura tárepinen ámelge asırılatuǵın wazıypalar anıq kórsetip ótildi.
Juwmaǵında tárepler Ózbekstan Respublikası Densawlıqtı saqlaw ministrligi hám BMSh Rawajlanıw baǵdarlaması birge islesiwiniń nátiyjesi sıpatında, bul kodeks joybarı xalıqaralıq standartlarǵa muwapıq islep shıǵılatuǵınına isenim bildirdi.

Mohigul Qosimova, ÓzA