Qaraqalpaqstan Respublikasında ekologiyalıq turaqlılıqtı támiyinlew hám energetika tarawın rawajlandırıwǵa qaratılǵan áhmiyetli joybar ámelge asırılmaqta.
Qattı turmıslıq shıǵındılardı termikalıq qayta islew arqalı elektr energiyasın islep shıǵarıwdı jolǵa qoyıw maqsetinde Bajıxana komiteti juwapkerleri tárepinen aymaqta úyreniw jumısları alıp barıldı.
Bul joybar sırt el investiciyaları tiykarında ámelge asırılıp, bul jumıs Beijing China Sciences Runyu Environmental Technology (CSET) menen jolǵa qoyılmaqta. Joybar shıǵındılardı zamanagóy texnologiyalar tiykarında jaǵıw arqalı qayta islew hám elektr energiyasına aylandırıwdı názerde tutadı.
Usı investiciyalıq joybardıń bahası 80 million AQSh dolların quraydı. Joybar sheńberinde respublikamız kóleminde jıynalatuǵın kúnlik 750, jıllıq 274 mıń tonna shıǵındı qayta islep, nátiyjede jılına 80 mıń MVt/saat elektr energiyası islep shıǵarıladı hám 80 jańa jumıs ornı jaratıladı.
Joybardıń ámelge asırılıwı nátiyjesinde respublika aymaǵındaǵı shıǵındı poligonlarınıń sanı 50 procentke qısqaradı. Sonday-aq, usı kárxananıń átirapında jaylasqan mákemeler menen shólkemler elektr energiyası menen úzliksiz támiyinlenedi.
Joybardı ámelge asırıw jumısları 2026-jıl fevral ayında baslanıp, 2028-jılı tolıq iske qosılıwı rejelestirilgen.
Bul baslama qorshaǵan ortalıqtı qorǵaw, shıǵındılardı nátiyjeli basqarıw hám xalıqtı turaqlı elektr energiyası menen támiyinlew arqalı aymaqtıń sociallıq-ekonomikalıq rawajlanıwın qollap-quwatlawda ayrıqsha áhmiyetke iye.

Á.Jiyemuratov,
Qaraqalpaqstan xabar agentligi