9-fevral – ullı shayır hám oyshıl Áliysher Nawayı tuwılǵan kúniniń 585 jıllıǵı múnásibeti menen “Jazıwshılar qıyabanı” bayramday bezeltildi hám shayır esteligi astında ádebiy-aǵartıwshılıq ilaj ótkerildi.
Onda mámleketlik hám jámiyetlik ǵayratkerler, shayır hám jazıwshılar, diplomatlar, sırt elli miymanlar, ádebiyattanıwshı ilimpazlar, dóretiwshilik shólkemler hám keń jámiyetshilik wákilleri jıynaldı. Áliysher Nawayı dóretiwshiligine baylanıslı jańa kitaplar kórsetildi. Yaponiya, Qıtay mámleketinen kelgen studentlerdiń Áliysher Nawayı ǵázzellerin sap ózbek tilinde aytıwı jámiyetshilik tárepinen jıllı kútip alındı.
Ilajdı Ózbekstan Jazıwshılar awqamınıń baslıǵı, Ózbekstan xalıq shayırı Sirojiddin Sayyid ashıp berdi. Áliysher Nawayı atındaǵı Tashkent mámleketlik ózbek tili hám ádebiyatı universitetiniń rektorı, akademik Shuhrat Sirojiddinov, Qırǵızstan Respublikasınıń Ózbekstandaǵı Ayrıqsha hám tolıq huqıqlı elshisi Duyshunqul CHotonov, italiyalı miyman Sandro Teti shıǵıp sóyledi. Italiyalı miyman “Lison ut-tayr”, yaǵnıy “Quslar tili” dástanı birinshi márte italyan tiline awdarılıp, usı mámlekette basıp shıǵarılǵanı menen watanlaslarımızdı qutlıqladı.
Bunnan soń belgili nawayıtanıwshı ilimpaz, Áliysher Nawayı fondınıń direktorı Olimjon Davlatovtıń fond tárepinen 2025-jılı Áliysher Nawayı dóretiwshiligin dúnya kóleminde úgit-násiyatlawǵa baǵıshlanǵan jumıslar haqqındaǵı maǵlıwmatları tıńlandı.
Sonday-aq, ilajda shıǵıp sóylegenler sóz mulkinin sultanı Áliysher Nawayınıń dóretiwshiligi, Nawayı danıshpanlıǵınıń dúnya kóleminde tán alınıwı haqqında aytıp berdi. Ózbekstan hám Qırǵızstan arasında barǵan sayın rawajlanıp atırǵan mádeniy-gumanitarlıq birge islesiw hám 2025-jılı Osh qalasında Áliysher Nawayı esteliginiń qurılǵanı haqqında aytıp ótildi.
Ilaj sońında qatnasıwshılar Áliysher Nawayı esteligine gúller qoydı.
Bunnan soń Jazıwshılar qıyabanında jazıwshı hám shayırlar, joqarı oqıw orınlarınıń professor-oqıtıwshıları hám studentleriniń qatnasıwında ádebiyat hám kitapqumarlıq ilajları bolıp ótti.

Sanjar Toshpwlatov, Doniyor Yakubov, Uluǵbek Twxtaev, ÓzA