Xojeli rayonı hákimliginde jınayatshılıq hám huqıqbuzarlıqlardıń aldın alıw, aymaqlarda jámiyetlik qáwipsizlikti bekkemlew máselelerine baǵıshlanǵan ushırasıw bolıp ótti.
Oǵan rayon hákimi J.Ermashev, Jınayat isleri boyınsha Xojeli rayonı sudınıń baslıǵı S.Davletmuratov, rayon prokurorı A.Xalimov, Ishki isler bólimi baslıǵı B.Xaytbaev hám ózin-ózi basqarıw uyımlarınıń basshıları, profilaktika inspektorları hám aymaq belsendileri qatnastı.
Ilaj dawamında mámleketimiz Prezidenti tárepinen videoselektor májilisinde belgilep berilgen tiykarǵı wazıypalardıń orınlanıwın támiyinlew, aymaqlarda jınayatshılıq hám huqıqbuzarlıqlardıń erte aldın alıw, jámiyetlik qáwipsizlikti bekkemlew máseleleri hár tárepleme dodalandı.
Jınayat isleri boyınsha Xojeli rayonı sudınıń baslıǵı S.Davletmuratov óziniń shıǵıp sóylegen sózinde korrupciyaǵa qarsı gúresiw máselelerine ayrıqsha toqtalıp, bul illet jámiyettiń rawajlanıwına úlken kedergi ekenin atap ótti. Sud baslıǵı korrupciyanıń hár qanday kórinisine mawasasız múnásibetti qáliplestiriw, mámleketlik uyımlardıń jumısında ashıq-aydınlıqtı támiyinlew, puqaralardıń huqıqıy sanası hám mádeniyatın arttırıw úlken áhmiyetke iye ekenligine itibar qarattı. Sonday-aq, hár bir lawazımlı shaxs óz jumısında nızam ústinligin támiyinlewi, xızmet wazıypaların hadallıq hám hújdan menen orınlawı zárúr ekenligin ayrıqsha atap ótti.
Sonıń menen birge, 2025-jıl dawamında rayonnıń 15 máhállesinde jınayat júz bermegenligi atap ótilip, bul aymaqlarda tınıshlıqtı támiyinlewde belsene qatnasqan aymaq belsendilerin xoshametlew máselesi kórip shıǵıldı. Bul nátiyjeler huqıq qorǵaw uyımları, profilaktika inspektorları hám aymaq belsendileri arasındaǵı tıǵız birge islesiwdiń nátiyjesi ekeni atap ótildi.
Ushırasıw juwmaǵında profilaktika inspektorları tárepinen aymaqlardaǵı jaǵdaydı jáne de jaqsılaw, jınayatshılıqtıń aldın alıw boyınsha pikir-usınıslar bildirildi. Ilaj konstruktivlik ruwxta ótti.

Qaraqalpaqstan xabar agentligi