Usı jıldıń 3-7-fevral sáneleri aralıǵında Tashkent qalasındaǵı Balalar milliy medicina orayınan kelgen tájiriybeli shıpakerler Qaraqalpaqstan medicina institutı klinikasında barlıq jastaǵı nawqaslardı qabıl etip, biypul medicinalıq tekseriw hám másláhátler bermekte.
Puqaralardıń densawlıǵın tiklew, olarǵa uzaq jol basıp paytaxtqa qatnawınıń aldın alıw maqsetinde ótkerilip atırǵan ilaj sheńberinde elimizdiń barlıq aymaqlarınan kelgen nawqaslar medicinalıq tekseriwden ótkerilip, zárúr jaǵdayda operaciyalar da ámelge asırılmaqta.
Salamatlıq akciyası sheńberinde Kardioxirurgiya, Nevrologiya, LOR, Balalar xirurgiyası, Neyroxirurgiya, Balalar urologiyası, Balalar onkogematologiyası, Plastik xirurg baǵdarları boyınsha nawqaslar qabıllanıp atır. Dúyshembi kúninen berli shıpakerler 12, jıl basınan berli 50 ge shamalas quramalı operaciyalardı ámelge asırdı.
– Ótken jılı oktyabr ayında ótkerilgen «Salamatlıq marafonı»nıń dawamı desek te boladı. Sebebi, akciya sheńberinde kelgen nawqaslar menen birge, Tashkent qalasındaǵı medicinalıq mákemelerde Qaraqalpaqstannan náwbette turǵan nawqaslardı da usı jerge shaqırıp, zárúrli medicinalıq xızmetlerdi kórsetip atırmız. Tekseriwden ótkerilgen hám tańlap alınıp, klinikaǵa jatqarılǵan nawqaslar ushın sarıplanatuǵın qárejetler Mámleketlik medicinalıq qamsızlandırıw qorınıń qarjıları esabınan qaplap beriledi, – deydi klinika bas shıpakeri Feruz Xamidov. – Keshe akciya sheńberinde kardioxirurgiya baǵdarı boyınsha nawqaslardı tańlap aldıq. 200 den aslam dopler tekseriwi nátiyjesinde 50 ge shamalas júrek tuwma nuqsanları menen kesellengen nawqaslardı anıqladıq. Olarda rejeli túrde operaciyalar ámelge asırıp barıladı.
– Usı jerde xızmette júrgen shıpakerlerge mıń-mıń raxmet, – deydi Zamira Allabergenova. – Tuwılǵannan berli perzentim grıjadan qıynalatuǵın edi. Búgin qızıma operaciya islenip, házir jaǵdayı jaqsı. Klinikada barlıq sharayatlar jaratılǵan. Zárúrli ásbap-úskenelerden biypul tekseriwden ótkerdi.
Barlıq tekseriw hám másláhátler biypul ámelge asırılmaqta. Tashkentli shıpakerlerdiń medicinalıq tekseriw hám operaciyaları jáne de dawam etedi. Biraq, aymaqlıq shańaraq poliklinikalarınan jollama menen jiberilgen 18 jasqa shekemgi balalar ǵana tekseriwden ótkeriledi.

M.Pirnazarova,
Qaraqalpaqstan xabar agentligi sholıwshısı.