Un – kúndelikli ómirimizde paydalanıp júrgen ápiwayı ónim sıyaqlı túyilse de, ol qapqa túsip, biziń qolımızǵa kelip jetemen degenshe kóplegen basqıshlardı basıp ótedi. Tirishilik arqawı bolǵan unnıń artında -awıl xojalıǵı, sanaat, energetika hám mámleket siyasatı menen baylanıslı bolǵan quramalı sistema jatadı. Demek, jerge taslanǵan ǵálleniń boy kóterip ónip-ósiwi hám qırmanǵa kelip jetiwi jolında diyqan-fermerlerdiń úlesi kóp bolsa, onı kárxanada un halına keltiriw jolında miynet etip atırǵan pidayı xızmetkerler menen bul jolda xalıqqa sapalı un ónimlerin jetkerip beriwge bel baylaǵan isbilermenniń ornı ayrıqsha ekenligin atap ótiw orınlı.
Prezidentimizdiń respublikamızdaǵı isbilermenler ushın jaratıp berip atırǵan imkaniyatlarınan orınlı paydalanıp, jumıs alıp barıp atırǵan isbilermenler qatarında Xojeli rayonı «Sarıshúngil» máhállesinde jaylasqan «Xojeli un ónimleri» JShJ 2022-jıldan berli xalqımızǵa sapalı túrde xızmet kórsetip kelmekte.
«Jas kelse iske» degenindey bul kárxanaǵa jas bolsa da istiń kózin biletuǵın isbilermen Yusupbek Karimov basshılıq etip kelmekte. Ol 4,5 gektar jer maydanǵa óz esabınan hám jeńilletilgen kredit járdeminde jámi 30,4 mlrd. sum qarjı sarıplap, un ónimlerin islep shıǵaratuǵın kárxanaǵa tiykar saldı. Azıq-awqat qáwipsizligi jolında xalqımızdıń un ónimlerine bolǵan talabın qanaatlandırıw ushın jumıs alıp barıp atırǵan kárxana Túrkiya texnologiyaları tiykarında kúnine 200 tonna, jılına 50 mıń tonna undı islep shıǵarıw imkaniyatların iske qosıp, eń áhmiyetlisi jańadan jetpiske jaqın jumıs orınların jaratıp, jaslardıń bántiligin támiyinledi.
Xalqımızdıń qońsılas Qazaqstan Respublikasınan alıp kelinetuǵın un ónimlerine bolǵan talabı artıp turǵan bir payıtta, ózimizdiń Xojeliden sapalı un ónimlerin islep shıǵaratuǵın kárxananıń iske túsiwi menen xalqımızdıń qaltasına qolaylı hám sapalı unnıń jetistiriliwi álbette, qarıydarlar ushın quwanıshlı jaǵday boldı. Búgingi kúnde kárxana tárepinen islep shıǵarılıp atırǵan un ónimleri Qaraqalpaqstan Respublikasınıń barlıq qala hám rayonlarına sonıń menen birge Xorezm wálayatınıń ishki bazarların támiyinlep qoymastan, sırt el bazarlarınada kirip barmaqta.
Atap aytqanda, ótken
2025-jıl dáwir ishinde Qazaqstan Respublikasınan biyday ónimi import etilip, onı qayta islep Awǵanstan mámleketine 5 mln. AQSh dollar muǵdarında un ónimi eksport etildi.
– Prezidentimiz tárepinen isbilermenler ushın jaratıp berilip atırǵan imkaniyatlar jumıslarımızdıń hesh qanday tosıqsız hám nátiyjeli alıp barıwımızǵa tiykar bolmaqta. Jaratılǵan imkaniyatlar, engizilgen salıq jeńilliklerinen paydalanǵan halda alıp barıp atırǵan jumıslarımız nátiyjesinde kárxanamız jılına 200 tonna un islep shıǵrarıwǵa mólsherlengen bolsa, biz házir jılına 150 tonna un ónimleri menen menen birge kombikorm islep shıǵarıp atırmız. Elimizdegi diyqan-fermerler menen birge Qazaqstan Respublikasınan da biyday alıp kelip paydalanıp atırmız. Burın import hám eksport máselelerinde biraz qıyınshılıqlarǵa dus keletuǵın edik. Mine endi Húrmetli Prezidentimizdiń arnawlı pármanı menen jergilikli isbilermenlerge bul máselelerde jeńilletilgen imkaniyatlar jaratıldı hám biz artıqsha áweregeshilik, sertifikatlar ushın tólemler menen waqıttan utatuǵın boldıq. Sonday-aq, energiyadan paydalınıwda da islep shıǵarıw kárxanalarına 15 procent jeńillik berildi. Qaraqalpaqstanlı isbilermenler ushın jaratılıp atırǵan imkaniyat hám jeńillikler ushın Prezidentimizge minnetdarshılıǵımız sheksiz – deydi kárxana baslıǵı Yu.Karimov.
Isbilermen keleshekte kárxananıń islep shıǵarıw quwatlıǵın kóteriw, jańa jumıs orınların elede kóbeytiw hám qońıslas mámleketlerge ónimdi eksport etiw jumısların jáne de jetilistiriwdi rejelestirmekte.
Álbette, mámleketimizde bunday múmkinshilikler nátiyjesinde xalqımızdıń azıq-awqat qáwipsizligi hám jaslardıń turaqlı túrde bántligin támiyinlewge imkaniyat jaratadı.
– Kárxanada úsh jıldan berli jumıs islep atırman. Bul jerde xalqımızdıń ırısqısı bolǵan un óniminiń islep shıǵarılıwı menen birge awızbirshilikli jámáátimiz qáliplesken. Jumıssız júrgen jaslardıń bántligi támiyinlengen. Aylıqlarmız jaqsı, óz waqtında alıp turmız, – deydi kárxana isshisi U. Jumanazarov.
Bul jerde shıǵarılıp atırǵan ónimdi xalqımızdıń talǵamına say un ekenligin biz paytaxtımızdaǵı «Náwpir» MPJ turǵını G.Ismailova menen sáwbetleskenimizde ol tómendegishe óz pikirlerin bildirdi:
– Eki jıldan berli usı ózimizde islep shıǵarılıp atırǵan Xojeli unnan paydalanıp atırmız. Nanımız da, awqatlarmız da júdá mazalı bolıp shıǵadı. Appaq bolıp porsıldap tandırda pisip shıqqan nanların jep toymaysań. Bahası da biziń sharayatımızǵa qolaylı, – deydi ol.
Prezidentimiz tárepinen Qaraqalpaqstan Respublikasındaǵı isbilermenler ushın basqa aymaqlarda joq, 50 den aslam jeńillikler paketi jaratıp berilgen bolsa, Yu.Karimov usı imkaniyatlardan orınlı paydalanıp atırǵan isbilermen ekenligin onıń jumısları mısalında gúwası boldıq. Ol un islep shıǵarıw kárxanasına qosımsha balıqshılıq tarawına da qol urıp, nanımızdıń tiykarı bolǵan un ónimleri menen birge jeti ǵáziyneniń biri bolǵan balıqshılıqtı rawajlandırıwǵa da úles qospaqta. Ol bul biznesinde de jaqsı tabısları menen kózge túspekte. Álbette bulardıń bári tınımsız miynet hám isbilermenge tán bolǵan izleniwshilik, táwekelshilik hám mámleketimizde alıp barılıp atırǵan ádil siyasat, reformalar tiykarında bolmaqta. Bunı biz juwmaq retinde, Prezidentimiz baslaması menen engizilgen keń kólemli jeńillikler respublikamız isbilermenleri turmısında úlken burılıs jasadı, salıq, qarjı jeńillikleri hám investiciyalıq qollap-quwatlawlar jergilikli biznestiń turaqlı rawajlanıwına bekkem tiykar bolmaqta dep ayta alamız. Demek, Prezidentimizdiń «Biliń artıńızda Prezident tur, hesh nárseden qorıqpań!»-degen sózi biziń isbilermenlerimizge úlken motivaciya bolmaqta. Bul qollap-quwatlawlar menen respublikamızdan Yusupbek sıyaqlı ele bir neshe isbilermenler jetisip shıǵıwına mádet boları sózsiz.

Gúlnara Turdıshova, Qaraqalpaqstan xabar agentligi sholıwshısı