Ózbekstan Respublikası Prezidenti Shavkat Mirziyoevtiń Pakistan Islam Respublikasına mámleketlik saparınıń ilajlarǵa bay baǵdarlaması juwmaqlandı.
Mámleketimiz basshısı Islamabadta Pakistan Islam Respublikası Prezidenti Asif Ali Zardoriy hám Pakistan Islam Respublikası Bas ministri Shahboz Sharif penen hár tárepleme sóylesiwler ótkerdi. Ózbekstan – Pakistan doslıq hám strategiyalıq sheriklik qatnasıqların bunnan bılay da bekkemlew jáne siyasat, sawda-ekonomika, investiciya, transport, logistika hám gumanitarlıq tarawlardaǵı ámeliy birge islesiwdi keńeytiwge baylanıslı tiykarǵı máseleler dodalandı.
Joqarı dárejedegi sóylesiwlerdiń juwmaǵında tiykarǵı tarawlarda birge islesiwdi tereńlestiriw hám birgeliktegi joybarlardı ámelge asırıwǵa qaratılǵan eki tárepleme hújjetlerdiń salmaqlı toplamına qol qoyıldı.
Sonday-aq, Pakistan Qorǵanıw kúshleri Bas sárkardası – Qurallı Kúshlerdiń Qurǵaqlıqtaǵı áskerleri sárkardası Asim Munir, Bas ministrdiń orınbasarı, sırtqı isler ministri Isxoq Dor menen ushırasıwlar bolıp ótti.
Mámleketimiz basshısı eki kúnlik sapar dawamında Ózbekstan – Pakistan biznes forumında qatnastı hám Pakistannıń jetekshi isbilermen toparlarınıń wákilleri menen ushırastı.
“Ayvoni Sadr” rezidenciyasında Ózbekstan Respublikası Prezidentine Pakistannıń joqarı mámleketlik sıylıǵı – “Nishoni Pakistan” ordenin tapsırıw máresimi bolıp ótti.
Bunnan tısqarı, mámleketimiz basshısına Pakistannıń jetekshi joqarı bilimlendiriw mákemelerinen biriniń húrmetli doktorı hám professorı ataqları berildi.
Pakistan paytaxtındaǵı kóshelerden birine Tashkent, jańadan qurılıp atırǵan baǵqa Zahiriddin Muhammad Babur atı berilgeni tariyxıy miyrastıń uqsaslıǵı, Ózbekstan hám Pakistan xalıqlarınıń jáne de jaqınlasqanınıń belgisi boldı.
Mámleketlik sapar juwmaqlanǵannan soń, Prezidentimiz Tashkentke jónep ketti. “Nurxon” aeroportında joqarı mártebeli miymandı Pakistan Bas ministriniń arnawlı keńesgóyi – sanaat hám óndiris ministri Xarun Axtar hám basqa da rásmiyler shıǵarıp saldı.

ÓzA