Ózbekstan Respublikası Salıq komiteti tárepinen Nókis qalasında respublikamızdaǵı 500 den aslam isbilermenlerdiń qatnasıwında “Salıq forumı – 2026” ilajı shólkemlestirildi.
Ushırasıw dawamında qánigeler tárepinen 2026-jılı salıq nızamshılıǵına kirgizilgen ózgerisler hám qosımshalar haqqında keń túrde maǵlıwmatlar berilip, pikir-usınıslar bildirildi.
Bul ilaj biznes wákilleri, iri salıq tólewshiler hám salıq uyımları arasında ashıq sóylesiw maydanına aylanıp, qánigeler tárepinen salıq nızamshılıǵındaǵı 110 nan aslam jańalıqlar boyınsha prezentaciyalar ótkerildi. Olardı ámeliyatta qollanıw tártibi boyınsha túsinikler berildi.
Bunnan tısqarı, isbilermenler salıq hákimshiligin bunnan bılay da jetilistiriwge baylanıslı ózleriniń pikir-usınısların bildirdi.
Álbette, bunday forumlardıń ótkeriliwi isbilermenlerdiń salıq nızamshılıǵı boyınsha bilimin arttırıw, óz-ara isenimdi bekkemlew jáne biznes hám salıq uyımları arasında konstruktivlik sóylesiw hám birge islesiwdi rawajlandırıwǵa xızmet etedi.
Ilajda bildirilgen barlıq múrájatlar, pikir-usınıslar ulıwmalastırılıp, Salıq komitetine usınıladı.
Ilaj dawamında qatnasıwshılar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.