Ózbekstan Respublikası Prezidenti Shavkat Mirziyoev 6-fevral kúni Islamabad qalasına mámleketlik saparınıń isbilermenlik baǵdarlaması sheńberinde Pakistan Bas ministri Shahboz Sharif penen birgeliktegi biznes forumda qatnastı.
Ilajda eki mámlekettiń 300 den aslam jetekshi sanaat kárxanaları hám sawda kompaniyaları, tarmaq shólkemleri jáne isbilermenlik strukturalarınıń basshıları hám wákilleri qatnastı.
Pakistan tárepinen “PEL”, “Waves Singer”, “Sadaqat”, “Fauji”, “Platinum”, “Fast Cables”, “National Fruit”, “Amson Group”, “Shaigan”, “Hans International”, “Secure Logistics Group”, “NLC”, “Fairmont”, “Go Dairy”, “Engro”, “Herbion”, “AGP”, “Arco”, “Habib Rafiq”, “Pakistan Steel Mills”, “Siddiq Sons”, “Uniworth”, “Diners”, “Fatima Group”, “Fateh Group”, “Hub Leather”, “Siddiq Leather”, “Royal Leather”, “Davis”, “Ahsan Dyeing” hám basqa da kóplegen kompaniyalar qatnastı.
Mámleketimiz basshısı óziniń shıǵıp sóylegen sózinde joqarı dárejedegi sóylesiwler Ózbekstan – Pakistan qatnasıqların, bárinen burın, sawda-ekonomikalıq hám investiciyalıq jaqtan rawajlandırıwda jańa basqıshtı baslap bergenin úlken qanaatlanıwshılıq penen atap ótti.
Óz-ara baylanıslar tariyxında birinshi márte ekonomikalıq birge islesiwge jańa sapa baǵıshlaw hám sawda kólemin 2 milliard dollarǵa jetkeriwdi názerde tutatuǵın protokolǵa qol qoyıldı.
Eki mámleket juwapkerlerine kompleksli “jol kartası”n islep shıǵıw hám júzege keletuǵın máselelerdi jedel sheshiw mexanizmin engiziw tapsırıldı.
Ózbekstan Prezidenti ekonomikalıq sherikliktiń áhmiyetli baǵdarların kórsetip ótti. Farmacevtika hám medicina, jeńil sanaat, kán-metallurgiya tarmaǵı hám geologiya, azıq-awqat qáwipsizligi tarawındaǵı birge islesiwdi keńeytiw solardıń qatarına kiredi.
Pakistan kompaniyaları Ózbekstandaǵı dári quralları, biotexnologiyalar hám medicinalıq úskenelerdi lokalizaciyalaw joybarlarına mirát etildi. Tashkent farmacevtika parkinde pakistanlı investorlar ushın qolaylı sharayatlar jaratıladı.
Xalıqaralıq brendler ushın tayar toqımashılıq ónimlerin birgelikte islep shıǵarıwda úlken potencial bar ekenligi atap ótildi. Ózbekstan toqımashılıq kárxanaların isenimli basqarıwǵa beriw hám pakistanlı sherikler ushın óz aldına bılǵarı sanaatı zonaların shólkemlestiriwge tayar.
Gósh, kartoshka hám gúrishti birgelikte jetistiriw, sonday-aq, tuqımgershilik hám selekciya tarawında Pakistan Milliy genomika institutı menen sheriklik perspektivalarına ayrıqsha itibar qaratıldı.
Transport-logistika tarawındaǵı óz-ara baylanıslılıqtı kúsheytiw sawda kólemin jáne de arttırıwdıń áhmiyetli shárti bolıp esaplanadı.
“Pakistan – Qıtay – Qırǵızstan – Ózbekstan” jónelisi boylap júk tasıw, Lahor hám Islamabad qalalarına bolsa aviaqatnawlar jolǵa qoyıldı, Transawǵan temir jolın qurıw joybarı alǵa qoyılmaqta. Usı jıldıń aprel ayınan Karachiǵa júk reysleri hám Lahorǵa tikkeley jolawshı reysleri jolǵa qoyıladı.
Aymaqlar arasındaǵı baylanıslardı ámeliy jaqtan bekkemlew maqsetinde usı jılı birinshi Aymaqlararalıq forumdı ótkeriw baslaması qollap-quwatlandı.
Ilaj juwmaǵında Ózbekstan jetekshisi hám Pakistan Bas ministri erisilgen kelisimler haqqında ayrıqsha Protokolǵa qol qoydı. Onda ámelge asırıw múddetleri hám eki mámlekettiń bul ushın juwapker ministrlikler hám uyımlardıń basshıları belgilep alındı.
Sonday-aq, jetekshiler janında bir qatar investiciyalıq hám sawda-ekonomikalıq kelisimlerdi almasıw máresimi boldı.

ÓzA