Ózbekstan Respublikası Suw xojalıǵı ministri Shavkat Hamraev Qońırat rayonında kóshpeli qabıllaw ótkerdi.
Ilajda Qaraqalpaqstan Respublikası suw xojalıǵı ministri B.Yusupov, rayon hákimi B.Madaminov, suw xojalıǵı juwapkerleri, melioraciya, nasos stanciyaları basqarmalarınıń basshıları, fermerler hám basqa da suwdan paydalanıwshılar qatnastı.
Sh.Xamraev dáslep mámleketimiz suw xojalıǵı tarawında ámelge asırılıp atırǵan reformalar, Mámleketimiz basshısı tárepinen tarawdı bunnan bılay da jetilistiriw maqsetinde qabıl etilgen párman hám qararlardıń orınlanıwın támiyinlew boyınsha kórilip atırǵan ilajlar haqqında maǵlıwmat berdi.
Atap aytqanda, usı jıldıń 3-fevral kúni Prezidentimiz janında suw resurslarınan nátiyjeli paydalanıwdı támiyinlew hám suwdı únemleytuǵın texnologiyalardı keńnen engiziw boyınsha ótkerilgen prezentaciyada bul baǵdardaǵı jumıslardıń kólemin bunnan bılay da keńeytiw boyınsha islep shıǵılǵan jańa usınıslar kórip shıǵılǵanı hám belgilengen wazıypalarǵa toqtap ótti.
Sonıń ishinde, suwdı únemleytuǵın texnologiyalardı satıp alıw hám qurıw maqsetinde kommerciyalıq bankler tárepinen ajıratılǵan kreditler boyınsha procentlerdiń bir bólegin qaplap beriw jolǵa qoyılatuǵını, ǵawasha maydanlarında tamshılatıp suwǵarıw texnologiyasın engiziw ushın kredit qarjıları hár jılı noyabr ayınan baslap ajıratılatuǵını sıyaqlı máselelerdi atap ótildi.
Bunnan soń ilaj ashıq sáwbetlesiw tárizinde dawam ettirilip, suwdan paydalanıwshılardıń múrájatları tıńlandı.
Kóshpeli qabıllaw dawamında aymaqtaǵı “Babajanov Oralbay,” “Qashaq,” “Dosmurat baba,” “Tórt qara seksen,” “Karimbergen Alaǵayım”, “Nuratdin Nursayt” hám basqa da fermer xojalıqlarınıń basshıları suw xojalıǵı máseleleri boyınsha ózleriniń múrájatları menen shıqtı. Jámi onnan aslam múrájat etilgen bolsa, barlıǵına ministr tárepinen hár tárepleme túsinikler berildi hám olardıń kópshiligi óz ornında sheshildi.
Qosımsha úyreniw talap etiletuǵın múrájatlardı ornına shıqqan halda kórip shıǵıw boyınsha Qońırat rayonı “Suw jetkerip beriw xızmeti” mámleketlik mákemesi, Nasos stanciyaları hám energetika basqarması, “Súwenli” irrigaciya sisteması basqarması basshılarına tapsırmalar berildi.
Sonday-aq, Qaraqalpaqstan Respublikası suw xojalıǵı ministri B.Yusupovqa búgingi kóshpeli qabıllawda qabıl etilgen múrájatlardı ayrıqsha qadaǵalawǵa alıw hám unamlı sheshiw boyınsha wazıypa júklendi.
Ózbekstan Respublikası Suw xojalıǵı ministriniń basqa da rayonlarda suwdan paydalanıwshılar menen sáwbetlesiw ótkeriwi, ámelge asırılıp atırǵan jumıslar menen tanısıwı dawam etpekte.

Á.Jiyemuratov,
Qaraqalpaqstan xabar agentligi.