Ózbekstan Kórkem óner galereyasında Respublikalıq ruwxıylıq hám aǵartıwshılıq orayı tárepinen tayarlanǵan “Milliy qádiriyatlar atlası”nıń prezentaciyası bolıp ótti.
Saltanatlı ruwxta shólkemlestirilgen bul ánjumanǵa dóretiwshi zıyalılar, ilimpazlar, mánawiyat úgit-násiyatlawshıları, jaslar mirát etildi.
Respublikalıq ruwxıylıq hám aǵartıwshılıq orayınıń basshısı Otabek Hasanov, Ózbekstan Súwretlew kórkem óneri galereyasınıń direktorı, kórkem ónertanıwshı ilimpaz, akademik Kamola Aqilova, ádebiyattanıwshı ilimpaz Rahmon Qwchqor, Ózbekstan Respublikası Milletleraralıq qatnasıqlar hám sırt eldegi watanlaslar máseleleri boyınsha komitetiniń baslıǵı Qahramon Sariev hám basqalar ruwxıylıqqa itibar Prezidentimiz Shavkat Mirziyoevtiń baslaması tiykarında jańa Ózbekstannıń tiykarın jaratıwday juwapkershilikli processte tiykarǵı áhmiyetke iye bolıp atırǵanın atap ótti.
Millettiń óz kórinisi, mentaliteti, tábiyatın saqlap qalıwda onıń dástúrleri hám qádiriyatları úlken áhmiyetke iye. Búgingi oǵada qıyın globallasıw sharayatında málimleme almasıwı jedellesip, túrli mádeniyatlar óz-ara jaqınlasıp atırǵan bir waqıtta milliy ózlikti qásterlep saqlaw, ázeliy qádiriyatlar menen dástúrlerdi saqlap qalıw hám olardı keleshek áwladqa jetkeriw hár tárepleme áhmiyetli. Sebebi, hár bir xalıqtıń tariyxı, ruwxıy dúnyası hám turmıs tárizi áyne usı qádiriyatlar arqalı kórinedi.
Milliy dástúrlerdi umıtpaw, olardı zaman talaplarına sáykes halda rawajlandırıw hám keńnen úgit-násiyatlaw jas áwladta watansúyiwshilik, milliy maqtanısh hám ózlikti ańlaw sezimlerin qáliplestiredi. Sonlıqtan, milliy mádeniyatımız, úrp-ádetlerimiz hám ruwxıy miyrasımızdı qásterlep saqlaw jáne dúnya kóleminde keńnen úgit-násiyatlaw búgingi kúnniń eń áhmiyetli wazıypalarınan esaplanadı.
Usı maqsette Ózbekstan Respublikası Prezidenti basshılıǵında 2023-jıl 22-dekabr kúni bolıp ótken Respublikalıq Ruwxıylıq hám aǵartıwshılıq keńesiniń keńeytilgen májilisinde belgilengen wazıypadan kelip shıǵıp, “Milliy qádiriyatlar atlası” kitap-albomı, arnawlı veb-platforma hám mobil qosımsha jaratıldı.
Joybar sheńberinde 28 ilimpaz, zıyalılar hám joqarı mamanlıqtaǵı qánigelerden ibarat dóretiwshilik topar qáliplestirilip, 8 baǵdar – Jańa Ózbekstannıń milliy qádiriyatları, milliy-ádep-ikramlılıq qádiriyatlar, úrp-ádetler, máresimler, bayramlar, milliy oyınlar, milliy-tábiyǵıy hám milliy-kórkem qádiriyatlar boyınsha keń kólemli izertlew jumısları alıp barıldı.
Barlıq aymaqlardan jıynalǵan maǵlıwmatlar tiykarında ózbek, inglis hám rus tillerinde “Milliy qádiriyatlar atlası” kitap-albomı basıp shıǵarıldı. Basılımdı tayarlaw procesinde 1,7 mıńnan aslam tekst, 3 mıńnan aslam súwret, 300 den aslam milliy qosıq hám 2 mıńǵa shamalas video hám audio materiallar tallandı.
Kitapta Oraylıq Aziyada qáliplesken joqarı ilimiy-mádeniy ortalıq sáwlelendiriledi. Áyyemgi túrkiy jazıwlar, xalıq awızeki dóretiwshiligi úlgileri, sonday-aq, alımlardıń miyrası milliy qádiriyatlardıń tiykarǵı derekleri sıpatında tallanadı. Ámir Temur hám temuriyler dáwirinde ilim-pán, mádeniyat hám islam qádiriyatlarınıń rawajlanıwı ayrıqsha tán alınadı.
Sonday-aq, millet hám milliy qádiriyatlar arasındaǵı óz-ara baylanıslılıq, olardıń etnikalıq mákan, til, tariyxıy yad hám genofond penen tıǵız baylanıslılıǵı ashıp beriledi. Ózbek xalqına tán úrp-ádetler, shańaraq hám jámiyettegi ádep-ikramlılıq normaları milliy qádiriyatlardıń ámeliy kórinisi sıpatında talqılanadı.
Bul kitap-albom milliy qádiriyatlardıń tariyxıy úzliksizligi, miyrasxorlıǵı hám búgingi jámiyettiń rawajlanıwındaǵı áhmiyetin sáwlelendiriwge xızmet etedi.
Sonday-aq, usı materiallar tiykarında qadriyatim.uz elektron platforması hám onıń mobil qosımshası islep shıǵıldı. Platforma turaqlı jańalanıp barılatuǵın, sırt elli paydalanıwshılar hám sırt eldegi watanlaslar ushın milliy qádiriyatlar, materiallıq hám materiallıq emes mádeniy miyras haqqında bir neshe shet tillerde maǵlıwmat beretuǵın interaktiv málimleme bazası bolıp esaplanadı.
Búgingi kúnde “Milliy qádiriyatlar atlası” kitap-albomı mámleketimiz boylap joqarı bilimlendiriw mákemeleri, milliy mádeniyat orayları hám turistlik obektlerde keń jámiyetshilikke usınılmaqta.
Sonıń menen birge, usı jılı “Watanlaslar” jámiyetlik fondı menen birgelikte kitap-albomdı qosımsha 1000 nusqada basıp shıǵarıw, sırt eldegi watanlaslar hám diaspora wákilleriniń qatnasıwında elshixanalarda prezentaciyalar ótkeriw, sonday-aq, kitap-albomnıń ózbek, inglis hám qıtay tillerindegi jańa basılımların tayarlaw rejelestirilgen.
– Bul kitap ózbek qádiriyatı, milliyligimizge baylanıslı sorawlarǵa qısqa hám anıq juwap alıw múmkin, – dedi Ózbekstan Súwretlew kórkem óneri galereyasınıń direktorı, kórkem ónertanıwshı ilimpaz, akademik Kamola Oqilova. – Bul kitap jaslarımız ushın oǵada áhmiyetli. Sebebi, búgingi qıyın globallasıw dáwirinde olar kimlerdiń áwladı ekenin tereń ańlawına imkaniyat beredi.
Prezentaciyada “Milliy qádiriyatlar atlası” kitap-albomı haqqında tolıq sóz etildi. Milliy hám biytákirar qádiriyatlarımızdı kórsetetuǵın muzıkalı baǵdarlama qatnasıwshılar itibarına usınıldı.

Nazokat Usmonova,
Oybek Pardaev (suwretler), ÓzA