Mámleketimizde isbilermenlik ortalıǵı kún sayın jaqsılanbaqta. Tarawda jańa óndiris túrleri kóbeyip, san hám sapa úylesimligine erisiw jolında bir qatar jeńillik hám imkaniyatlar berilmekte.
Isbilermenlerdiń huqıqların qorǵaw boyınsha Májbúriy orınlaw byurosı tárepinen keń kólemli ilajlar ámelge asırılmaqta.
Atap aytqanda, “WUDI HUAYI BIOLOGICAL TECHNOLOGI CO” JShJ nıń “VISHE KRISHI TASHKENT” JShJ dan qarızdı óndiriw haqqındaǵı Puqaralıq isleri boyınsha Qońırat rayonlararalıq sudınıń orınlaw hújjeti Májbúriy orınlaw byurosı Moynaq rayonı bóliminiń is júrgiziwine kelip túsken.
Bólim mámleketlik orınlawshısı tárepinen tekseriwler dawamında málim bolıwınsha, jámiyet tárepinen 92,737 AQSh dolları muǵdarında pul qarjıları tólep berilmegen. Hújjettiń orınlanıwın támiyinlew maqsetinde qarızdardıń bank esap betlerine sheklew qoyılıp, oǵan tiyisli bolǵan “Lasetti” markalı avtotransport quralı tiyisli tártipte xatlawǵa alındı hám aukcion sawdalarına shıǵarıldı.
Ótkerilgen aukcion sawdalarında avtomashina 82 million 83 mıń sumǵa satılıp, qarızdarlıqtıń qalǵan bólegi qarızdardıń bank esap betinen óndirildi.
Óndirilgen pul qarjıları usı jıldıń 30-yanvar kúni óndiriwshige ótkerip berilip, isbilermenniń buzılǵan huqıqları tikleniwine erisildi.

Qaraqalpaqstan xabar agentligi