Qaraqalpaqstan Respublikası prokurorı Sh.Aminov tárepinen Ámiwdárya rayonında Ózbekstan Respublikası Prezidentiniń 2026-jıl 5-yanvardaǵı “Respublika máhállelerinde qáwipsiz ortalıqtı jaratıw baǵdarında birden-bir mánzilli jumıs islew sistemasın engiziwge qaratılǵan qosımsha ilajlar haqqında”ǵı qararınıń orınlanıwı boyınsha islengen jumıslar sın kózqarastan dodalandı.
Májiliste, rayonda júz bergen ulıwma jınayatlardıń 74 procenti aldın alıw múmkin bolǵan jınayatlar ekeni, shańaraqlıq zorlıqlardıń keskin artıp ketkeni, oǵan sebep juwapkerler menen máhálle jetiligi nátiyjeli hám birgelikte jumıs alıp barmaǵanı keskin sınǵa alındı.
Juwapkerlerge sociallıq profilaktika jumısların nátiyjeli shólkemlestiriw, shańaraqlıq-turmıslıq qatnasıqlar sheńberinde jınayatlardı, shańaraqlıq zorlıqlardıń aldın alıwdıń keskin ilajların kóriw, jınayatlardıń sebep hám faktorların anıqlap, waqtında saplastırıw, sociallıq profilaktika ilajların kúsheytiw sıyaqlı wazıypalar belgilep berildi.
Bunnan soń, huqıq qorǵaw uyımları hám shólkemler basshılarınıń túsindiriwleri hám málimlemeleri tıńlandı jáne belgilengen wazıypalardıń orınlanıwın nátiyjeli támiyinlew boyınsha tiyisli kórsetpeler berildi.
Bunnan soń, rayon prokuraturasında huqıq qorǵaw uyımlarınıń operativ xızmetkerleriniń qatnasıwında Prezidentimiz tárepinen usı jılı 27-yanvardaǵı májiliste berilgen tapsırmalarǵa bola, shólkemlesken jınayatshılıq, kiberjınayatlar hám jasırın ekonomikanı saplastırıw baǵdarındaǵı kemshilikler, sintetikalıq-psixotrop dárilerdiń nızamsız aylanısqa kirgiziliwi menen baylanıslı jaǵdaylar ulıwma anıqlanbaǵanlıǵı, náshebentlik zatlardıń nızamsız aylanısı menen baylanıslı jaǵdaylar bolsa júdá az anıqlanǵanlıǵı sınǵa alındı hám tiyisli baǵdarlar boyınsha jumıslardı durıs shólkemlestiriw boyınsha juwapkerlerge anıq tapsırmalar berildi.

Qaraqalpaqstan xabar agentligi