Energetika sistemasın modernizaciyalaw, ásirese, gidroenergetika tarmaǵın rawajlandırıw mámlekettiń turaqlı ekonomikalıq ósiwi hám ekologiyalıq taza energiya dereklerin keńeytiwde úlken áhmiyetke iye.

Keyingi jıllarda bar gidroelektr stanciyaların jańalaw, olardıń nátiyjeliligin arttırıw hám zamanagóy texnologiyalardı engiziwge qaratılǵan iri joybarlar izbe-iz ámelge asırılmaqta. Bul processte xalıqaralıq birge islesiwdi keńeytiw, aldınǵı tájiriybe hám investiciyalardı tartıw tiykarǵı baǵdarlardan birine aylanbaqta.

Mine, usınday jumıslar sheńberinde “Ózbekgidroenergo” AJda gidroenergetika tarawında áhmiyetli qádem sıpatında GESlerdi modernizaciyalaw boyınsha jańa kelisimlerge erisildi.

Usı múnásibet penen shólkemlestirilgen ilajda “Ózbekgidroenergo” AJ hám Qıtaydıń “Sinohydro Co., Ltd.” kompaniyası arasında strategiyalıq birge islesiwdi rawajlandırıwǵa qaratılǵan shártnamalarǵa qol qoyıldı.

Ótkerilgen ashıq-aydın tender processleriniń juwmaqlarına bola, belgilengen barlıq texnikalıq hám sapa normalarına tolıq juwap bergen, tarawda bay tájiriybege iye bolǵan Qıtaydıń “Sinohydro Co., Ltd.” kompaniyası tender jeńimpazı sıpatında tán alındı.

Usı kelisimge tiykarlanıp Ándijan wálayatındaǵı Shaxrixan GESler kaskadı – GES-5A hám GES-6Anı modernizaciyalaw joybarı ERS shártleri tiykarında ámelge asırıladı. Joybar tayar halda tapsırıw principine muwapıq engiziledi. Yaǵnıy, joybar sheńberinde joybarlaw jumısları, qurılıs, texnologiyalıq úskeneler hám inventarlardı jetkerip beriw jáne obektlerdi iske qosıw jumısları tolıq ámelge asırıladı.

Jámiyet málimleme xızmetiniń bas qánigesi Xulkar Jwraevanıń sózlerine bola, bul jumıslar GESlerdiń óndiris quwatlılıǵın hám ulıwma nátiyjeliligin sezilerli dárejede arttırıw, texnologiya hám basqarıw sistemaların modernizaciyalaw hám energetika obektleriniń turaqlılıǵın támiyinlew imkaniyatın jaratadı.
– Sonıń ishinde, bul gidroelektr stanciyalarınıń modernizaciyalanıwı nátiyjesinde ámeldegi ulıwma 7,6 MVt quwatlılıq 16,4 MVt ǵa jetkerilip, qosımsha 7,8 MVt quwatlılıq jaratıladı hám jılına qosımsha 33 mln kVt.saat elektr energiyasınıń islep shıǵarılıwına erisiledi. Nátiyjede jılına 13 mıńnan aslam shańaraq elektr energiyası menen támiyinlenip, 11 million metr kub tábiyǵıy gaz hám 27,5 mıń tonnadan aslam kómir únemlenedi. Bul joybar eki tárepleme birge islesiwdi bunnan bılay da bekkemlew, Ózbekstan gidroenergetika sistemasında innovaciyalıq texnologiyalardı keńnen engiziw hám zamanagóy xalıqaralıq standartlardı engiziwge xızmet etedi. Sonıń menen birge, GESlerdi modernizaciyalaw arqalı regionallıq energetika qáwipsizligin bekkemlew, ekologiyalıq taza energiya islep shıǵarıw hám turaqlı energiya támiynatın támiyinlew imkaniyatları keńeyedi, – dep atap ótti H.Jwraeva.

Nasiba ZIYoDULLAEVA,
ÓzAnıń xabarshısı