Tashkentte “Oraylıq Aziya – Germaniya” tallaw oraylarınıń birinshi onlayn-forumı bolıp ótti.
Oraylıq Aziya xalıqaralıq institutı (ORXI) tárepinen ekspertler dodalawı tárizinde shólkemlestirilgen ilaj sheńberinde 2024-jıl sentyabr ayında Astana qalasında ótken “Oraylıq Aziya – Germaniya” sammiti, sonday-aq, 2025-jıl aprel ayında Samarqandta bolıp ótken “Oraylıq Aziya – Evropa Awqamı” sammitiniń juwmaqlarınan kelip shıǵıp, eki hám kóp tárepleme birge islesiwdiń búgingi jaǵdayı hám perspektivası dodalandı.
Ánjumanda táreplerdiń jetekshi tallaw orayları hám ekspertlik strukturalarınıń wákilleri, sonıń ishinde, Ilim hám siyasat qorı Xalıqaralıq siyasat hám qáwipsizlik institutı (SWP) janındaǵı Shıǵıs Evropa hám Evraziya izertlewler toparı, Shıǵıs Evropa hám xalıqaralıq izertlewler orayı (ZOiS) hám Germaniya sırtqı siyasat jámiyeti (DGAP) qánigeleri shıǵıp sóyledi.
Keyingi jıllarda Germaniya hám Oraylıq Aziya mámleketleri arasındaǵı sawda-ekonomikalıq baylanıs sezilerli dárejede jedellesti, óz-ara sawda aylanısı 10,83 milliard evroǵa jetti. Sonıń ishinde, Germaniya eksportınıń kólemi 5,21 hám import kórsetkishi 5,62 milliard evronı quradı.
GFR kompaniyaları tárepinen region ekonomikasına kirgizilgen 12 milliard evrolıq investiciya nátiyjesinde 35 mıńnan aslam jańa jumıs ornı jaratıldı. Házirgi waqıtta nemis kapitalınıń qatnasıwındaǵı derlik 900 kárxana sanaat óndirisi hám xızmet kórsetiw tarawlarında nátiyjeli jumıs alıp barmaqta.
Bunday ushırasıwlar bolsa óz-ara sheriklikti jáne de bekkemlewge qatnas hám baslamalardı muwapıqlastırıw, jańa aldıńǵı ideyalardı alǵa qoyıw ushın ashıq, nátiyjeli sóylesiw maydanı wazıypasın atqaradı.

Dilshod HAKIMOV, Asliddin ALIJONOV (súwret),
ÓzA