Abu-Dabide Rossiya-Ukraina urısın juwmaqlaw boyınsha úsh tárepleme sóylesiwlerdiń birinshi kúni juwmaqlandı. Sóylesiwler búgin de dawam etedi. Ilaj jabıq formatta ótpekte, dep xabar berdi DW agentligi.
Rossiya delegaciyasına admiral Igor Kostyukov basshılıq etpekte. Ukraina delegaciyasına Milliy qáwipsizlik hám qorǵanıw keńesiniń xatkeri Rustem Umerov basshılıq etpekte. AQSh tárepinen bolsa sóylesiwlerde prezidenttiń arnawlı wákili Stiv Uitkoff, Donald Tramptıń kúyew balası Jared Kushner hám AQSh armiyası wákili Deniel Driskoll qatnaspaqta.
Politico basılımınıń xabarına bola, sóylesiwlerdegi tiykarǵı tema – aymaqlıq másele bolıp qalmaqta. Sóylesiwlerde tárepler bir qatar máseleler boyınsha kelisip alǵan, biraq aymaqlar máselesinde birdey qararǵa kele almaǵan. Birinshi basqıshtan soń AQSh mámleketlik xatkeri Marko Rubio Donbass máselesi elege shekem sheshilmegen birden-bir másele ekenin tastıyıqladı.
Rossiya Ukraina áskerlerin Donbasstan alıp shıǵıwdı talap etpekte, Kiev bolsa bul talaptı biykarlamaqta. Donbass Ukraina aymaǵınıń bir bólegi esaplanadı, biraq házirgi waqıtta onıń ayırım aymaqları Rossiya áskerleri qadaǵalawı astında. Aldınıraq, Ukraina prezidenti Vladimir Zelenskiy aymaqlar máselesi tek ǵana Rossiya prezidenti Vladimir Putin menen jeke ushırasıwda sheshiliwi múmkin ekenin aytqan edi.

Qaraqalpaqstan xabar agentligi