Qıtay elektromobillerde elektron basqarılatuǵın esik tutqıshlarınan paydalanıwdı qadaǵan etti, dep xabar berdi VSS.
Bunday túrdegi uslaǵıshlar birinshi márte Tesla avtomobillerinde qollanılǵan edi. Dúnyadaǵı qadaǵalaw uyımları elektromobillerdi puqta tekserip atır. Oǵan bir qatar ólim menen juwmaqlanǵan hádiyseler, sonıń ishinde, Qıtayda elektromobiller qatnasıwında júz bergen eki jol-transport hádiysesi sebep bolǵan. Bul jaǵdaylarda elektr sistemasındaǵı nasazlıq esiklerdi ashıwǵa kesent bergeni boljanbaqta.
Qıtay ǵalaba xabar qurallarınıń jazıwınsha, jańa qaǵıydalarǵa bola, avtomobillerdiń esiklerin ishten hám sırttan mexanikalıq usılda ashıw imkaniyatı bolǵan jaǵdayda ǵana satıwǵa ruqsat beriledi.
Qıtay Sanaat hám málimleme texnologiyaları ministrligi tárepinen dúyshembi kúni járiyalanǵan jańa talaplar 2027-jıl 1-yanvardan kúshke kiredi. Jańa talaplar tek ǵana Qıtayda satılatuǵın avtomobillerge tiyisli bolsa da, analitikler bul jańalıq pútkil dúnya boylap esik konstrukciyasın qayta kórip shıǵıwǵa túrtki bolıwı múmkin, dep esaplaydı. Sebebi, Qıtay xalıqaralıq elektromobil bazarında standartlar belgilewshi mámleket sıpatında óziniń abırayın barǵan sayın bekkemlemekte.

Qaraqalpaqstan xabar agentligi