Keshe, 4-fevral kúni Birlesken Arab Ámirlikleri paytaxtı Abu-Dabi qalasında Shayx Zoid atındaǵı “Insanıy doslıq” xalıqaralıq sıylıǵın tapsırıw máresimi bolıp ótti. Ózbekstan Respublikası Prezidenti Shavkat Mirziyoev sıylıqlaw máresimi qatnasıwshılarına videomúrájat jolladı.
Onda mámleketimiz basshısı sıylıqqa erisken Ázerbayjan Respublikası Prezidenti Ilham Aliev hám Armeniya Respublikası Bas ministri Nikol Pashinyandı qutlıqladı.
“Siyasiy jetekshilerdiń uzaq dawam etken kelispewshilikti aqılǵa uǵras sheshiw, tınıshlıqqa erisiw jolındaǵı birgeliktegi háreketleri, álbette, bul abıraylı sıylıqqa múnásip bolıp esaplanadı.
Erisilgen kelisim mashqalanı sheshiwge juwapkershilikli qatnastıń ayqın úlgisi bolıp, keń regionımızda turaqlılıqtı támiyinlew jolındaǵı tariyxıy qádem boldı.
Búgingi kúnde tek ǵana awızbirshilik, bir-birin qollap-quwatlaw hám tıǵız doslıq arqalı xalıqlarımızdıń ulıwma rawajlanıwı hám abadanlıǵın támiyinlew múmkin”, dedi Prezidentimiz máresim qatnasıwshılarına múrájatında.
Shavkat Mirziyoev Ózbekstan hár qanday kelispewshilik hám qarama-qarsılıqlardı tek ǵana siyasiy-diplomatiyalıq qurallar, xalıqaralıq huqıq principleri hám jaqsı qońsıshılıq tiykarında sheshiw tárepdarı ekenin atap ótti.
Sonday-aq, Birlesken Arab Ámirlikleri Basshılıǵınıń gumanitarlıq baslamalardı jedel alǵa qoyıw, xalıqaralıq maydanda qarım-qatnas mádeniyatın izbe-iz arttırıw baǵdarındaǵı xızmetleri ayrıqsha atap ótildi.

Qaraqalpaqstan xabar agentligi