Neft-gaz tarmaǵın texnologiyalıq jaqtan modernizaciyalaw, tereń qudıqlarda jumıs alıp barıw imkaniyatların keńeytiw hám óndiris processleriniń nátiyjeliligin arttırıw áhmiyetli wazıypalardan bolıp esaplanadı.
Usı maqsette “Ózbekneftgaz” akcionerlik jámiyeti tárepinen xalıqaralıq tájiriybe hám innovaciyalıq sheshimlerge iye kompaniyalar menen birge islesiw baylanısları izbe-iz rawajlandırılmaqta.
Usı kúnlerde “Ózbekneftgaz” AJ basqarması baslıǵı Abdugani Sanginovtıń qatnasıwında qıtaylı birge islesiwshiler menen bir qatar áhmiyetli ushırasıw hám sóylesiwler ótkerildi.
Bul haqqında shólkem málimleme xızmetiniń basshısı Mwmin Ibodov tómendegishe xabar berdi:
– Házirgi kúnlerde “Ózbekneftgaz” AJ basqarması baslıǵı Abdugani Sanginov basshılıǵındaǵı delegaciya Qıtayda xızmet saparında bolıp tur. Sapar etiw sheńberinde tárepler arasında hár tárepleme ámeliy áhmiyetke iye bolǵan ushırasıwlar shólkemlestirildi. Olarda jámiyet sistemasında geologiya-izlew, burǵılaw hám geofizika jumısların jańa sapa basqıshına alıp shıǵıwǵa qaratılǵan joybarlar dodalaw orayında boldı.
Sonıń ishinde, xalıqaralıq bazarda úlken tájiriybege iye “CNLC” kompaniyası menen bolıp ótken sóylesiwde joqarı temperatura hám basım sharayatında jumıs islep atırǵan qudıqlarda geofizikalıq izertlewler ótkeriw, sonday-aq, perforaciya xızmetlerin ámelge asırıw máseleleri tolıq kórip shıǵıldı. Tárepler 230°C qa shekemgi temperatura hám 1400 atmosferaǵa shekemgi basımda isley alatuǵın texnologiyalardı engiziw imkaniyatların talladı.
Sonıń menen birge, 7000 metrge shekem tereńliktegi qudıqlarda izertlewler alıp barıw, joqarı temperatura hám basımǵa beyimlesken zamanagóy geofizikalıq úskeneler komplekslerin jetkerip beriw máseleleri boyınsha pikir alısıldı.
Sóylesiwler sheńberinde jumısshı-xızmetkerler ushın qáwipsiz hám qolaylı miynet sharayatların jaratıw máselesine de ayrıqsha itibar qaratıldı. Atap aytqanda, vaxta usılında isleytuǵın xızmetkerlerdi tasıwda paydalanıw ushın Qıtaydıń Shandun wálayatında jaylasqan “Zhongtong Bus”, CHjenchjou qalasındaǵı “YUTONG Bus” hám Pekindegi “FOTON” kárxanalarında islep shıǵarılıp atırǵan avtobuslardıń texnikalıq imkaniyatları úyrenildi. “FOTON” kompaniyası menen transport quralların jetkerip beriw boyınsha óz aldına sóylesiwler ótkerildi.
Sonıń menen birge, “CNLC” quramına kiretuǵın Qıtay neft injenerligi hám qurılıs korporaciyası menen ushırasıwda “Ózbekneftgaz” AJnıń perspektivalı joybarların ámelge asırıwda zamanagóy injenerlik sheshimlerge tiykarlanǵan joybar hújjetlerin islep shıǵıwda birge islesiw hám Tashkent qalasında ilimiy-izertlew institutın shólkemlestiriw máseleleri boyınsha óz-ara kelisimlerge erisildi.
Zamanagóy burawlaw úskenelerin satıp alıw baǵdarında bolsa “SJ Petroleum Machinery” kompaniyası menen óz aldına ushırasıw shólkemlestirildi hám texnikalıq birge islesiw perspektivaları dodalandı.
Ushırasıwlar juwmaǵında basqarma baslıǵı Abdugani Sanginov ámelge asırılıp atırǵan joybarlar jámiyet jumısı ushın strategiyalıq áhmiyetke iye ekenin atap ótip, barlıq jumıslar aldınǵı texnologiyalar, joqarı sapa standartları hám belgilengen múddetler tiykarında orınlanıwı kerek ekenligin atap ótti.
Ótkerilgen sóylesiwler neft-gaz tarawında zamanagóy texnologiyalardı engiziw, tereń qudıqlarda jumıs alıp barıw imkaniyatların keńeytiw hám óndiris processleriniń nátiyjeliligin arttırıwǵa qaratılǵan áhmiyetli qádem boldı. Xalıqaralıq tájiriybe hám aldınǵı injenerlik sheshimlerge tiykarlanǵan bul birge islesiwler “Ózbekneftgaz” AJnıń perspektivalı joybarların izbe-iz ámelge asırıw, ilimiy-izertlew potencialın rawajlandırıw jáne tarmaqta turaqlı hám qáwipsiz jumıs ortalıǵın támiyinlewge xızmet etedi. Bul bolsa milliy neft-gaz sanaatınıń básekige shıdamlılıǵın arttırıwda ayrıqsha áhmiyetke iye.

Nasiba Ziyodullaeva, ÓzA