Ózbekstan Respublikası Prezidenti Shavkat Mirziyoev Iordaniya Hoshimiyler Patshalıǵı Senatınıń Baslıǵı Faysal Aqif Misqal al-Fayaz basshılıǵındaǵı delegaciyanı qabılladı.
Ushırasıw aldınan joqarı mártebeli miyman mámleketimiz basshısına Iordaniya Patshası Abdulla II ibn al-Husaynnıń qızǵın sálemin hám tileklerin jetkerdi.
Ótken jılı Samarqandta joqarı dárejede erisilgen kelisimlerdi ámelge asırıw sheńberinde Ózbekstan – Iordaniya keń kólemli sheriklik qatnasıqların bunnan bılay da rawajlandırıwdıń áhmiyetli máseleleri dodalandı.
Eki tárepleme baylanıslar hám almasıwlar jedel tús alǵanı qanaatlanıwshılıq penen atap ótildi. Óz-ara sawda kólemi hám qospa kárxanalardıń sanı artıp barmaqta.
Parlamentlerde shólkemlestirilgen “doslıq toparları” jumısın “jol kartası” tiykarında jedellestiriw, olardıń mámleket basshıları arasında erisilgen kelisimlerdiń nátiyjeli ámelge asırılıwın támiyinlewdegi rolin kúsheytiw áhmiyetli ekenligi atap ótildi.
Sawda, sanaat kooperaciyası, turizm hám mádeniy-gumanitarlıq tarawlardaǵı óz-ara birge islesiwdi keńeytiwge ayrıqsha itibar qaratıldı.
Atap aytqanda, usı jılı Tashkent qalasında bolıp ótetuǵın Húkimetleraralıq komissiyanıń birinshi májilisi hám jetekshi kompaniyalardıń biznes forumın nátiyjeli ótkeriw zárúr ekenligi atap ótildi.
Sonday-aq, áhmiyetli xalıqaralıq hám regionallıq máseleler boyınsha pikir alısıldı.

ÓzA