Qaraqalpaqstan Respublikası Mádeniyat ministrligi tárepinen tarawda nátiyjeli jumıs alıp barıp atırǵanlardı qollap-quwatlaw hám olardıń miynetin tán alıw maqsetinde 2023-jıldan baslap “Alǵıs” atamasında jıldıń eń belsendi mádeniyat xızmetkerlerin sıylıqlaw máresimi ótkerilip kelinbekte.
Qaraqalpaqstan kórkem óner sarayında bolıp ótken gezektegi «Alǵıs-2025» jıldıń eń belsendilerin sıylıqlaw máresiminde 19 nominaciya boyınsha jeńimpazlar sıylıqlandı.
Atap aytqanda, “Jaslardı tárbiyalawdaǵı belsendiligi ushın” nominaciyası menen Ózbekstan mámleketlik konservatoriyası Nókis filialı, “Mádeniy ilajlarda belsene qatnasqanlıǵı ushın” Ózbekstanda xızmet kórsetken artist Twlqin Jabborov, “Jıl dawamında nátiyjeli jumıs kórsetken mádeniyat bólimi” nominaciyası menen Tórtkúl rayonı Mádeniyat bólimi, “Jıl rejissyori” nominaciyası menen Ikram Abdikalikov, “Milliy atqarıw kórkem ónerin rawajlandırıwdaǵı belsendiligi ushın” jıraw Salamat Ayapov, “Jıldıń eń úlgili balalar muzıka hám kórkem óner mektebi” nominaciyası menen Ellikqala rayonı 23-sanlı balalar muzıka hám kórkem óner mektebi sıylıqlandı.
Sonday-aq, “Tarawdaǵı jańalıqlar hám reformalardı ǴXQda sáwlelendiriwdegi belsendiligi ushın,” “Jıldıń eń belsendi mádeniyat xızmetkeri,” “Jıldıń eń belsendi saxna hám ekran texnologiyaları qánigesi,” “Jıldıń eń belsendi teatr aktyorı,” “Balalar dóretiwshiligin rawajlandırıwdaǵı xızmetleri ushın,” “Jıldıń eń belsendi baletmeyster,” “Jıldıń eń belsendi ayaq oyınshısı,” “Jıldıń eń jaqsı mádeniy joybarı,” “Jıldıń eń belsendi qosıqshısı” nominaciyaları boyınsha da jeńimpazlar sıylıqlandı.
Sıylıqlardı óz iyelerine Qaraqalpaqstan Respublikası Ministrler Keńesi Baslıǵınıń orınbasarı R.Zarikeev hám Mádeniyat ministri B.Temirbaevlar tapsırdı.

Qaraqalpaqstan xabar agentligi