Oliy Majlis Senatına Iordaniya Hoshimiyler Patshalıǵı parlamenti Majlis al-Ayan (Senatı) Baslıǵı Faysal Akif al-Fayez basshılıǵındaǵı delegaciya keldi.
Senat Baslıǵı Tanzila Norboeva menen ushırasıwda Ózbekstan hám Iordaniya arasında óz-ara paydalı qatnasıqlar, atap aytqanda, parlamentleraralıq birge islesiwdi rawajlandırıw máseleleri dodalandı.
Eki mámleket xalıqların uqsas tariyx, mádeniy baylanıslar hám uqsas qádiriyatlar baylanıstırıp turatuǵını atap ótildi. Siyasiy, sawda-ekonomikalıq, investiciyalıq hám mádeniy-gumanitarlıq tarawlardaǵı birge islesiw barǵan sayın keńeyip barmaqta.
2025-jılı Iordaniya Patshası Abdulla II ibn al-Husaynnıń Ózbekstanǵa dáslepki mámleketlik saparı eki tárepleme qatnasıqlar tariyxında jańa basqıshtı baslap bergeni ayrıqsha atap ótildi. Bul sapar etiw sheńberinde qol qoyılǵan hújjetler hám qabıl etilgen “jol kartası” izbe-iz ámelge asırılıp atırǵanı atap ótildi.
Sonıń menen birge, Májlis al-Ayan Baslıǵı Faysal Akif al-Fayez Ózbekstan júzlegen palestinalılarǵa baspana bergeni, olarǵa kórsetilip atırǵan sociallıq qorǵaw hám gumanitarlıq járdemdi joqarı bahalap, Jaqın Shıǵıs mámleketleri atınan shın júrekten minnetdarshılıq bildirdi.
Ushırasıwda sawda-ekonomikalıq hám investiciyalıq birge islesiwdi jedellestiriw, húkimetleraralıq qospa komissiyanıń jumısın jolǵa qoyıw, isbilermenler keńesin shólkemlestiriw boyınsha pikir alısıldı. Eki mámlekettiń bar imkaniyatlarınan paydalanǵan halda ekonomikalıq joybarlardı keńeytiw hám qolaylı investiciyalıq ortalıqtı jaratıw áhmietli ekenligi ayrıqsha atap ótildi.
Mádeniy-gumanitarlıq, bilimlendiriw, turizm hám diniy-aǵartıwshılıq baǵdarlarda, sonday-aq, farmacevtika, awıl xojalıǵı hám kánshilik tarawlarında birge islesiwdi bunnan bılay da jedellestiriw máselelerine ayrıqsha itibar qaratıldı.
Eki mámleket parlamentleri arasındaǵı birge islesiwdi keńeytiw, nızam dóretiwshiligi jumısı hám parlamentlik qadaǵalaw boyınsha óz-ara tájiriybe almasıw máselelerine itibar qaratıldı.
Usı jıldıń yanvar ayında Oliy Majlis Senatında Iordaniya parlamentiniń joqarı palatası menen birge islesiw boyınsha parlamentleraralıq topar shólkemlestirilgeni atap ótilip, onıń jumısı sheńberinde parlament komitetleri arasında da turaqlı sóylesiwdi jolǵa qoyıw áhmietli ekenligi atap ótildi.
Sóylesiwlerdiń juwmaǵı boyınsha Túsinisiw memorandumına qol qoyıldı. Bul hújjet eki mámleket parlamentleri joqarı palataları arasında sistemalı birge islesiwdi rawajlandırıwǵa xızmet etetuǵını atap ótildi.
Ushırasıw juwmaǵında Faysal Akif al-Fayez Oliy Majlis Senatınıń Húrmetli miymanlar kitabına qoltańba jazıp qaldırdı.

N.Abduraimova,
ÓzAnıń xabarshısı