Ózbekstan tutınıwshılardıń huqıqların qorǵaw jámiyetleri federaciyası tárepinen mámleketimizdegi ulıwma bilim beriw mektepleriniń oqıwshıları ushın arnawlı shereklik stipendiyası engizildi.
Bul baslama oqıwshılardıń huqıqıy bilimlerin bekkemlew, tutınıw mádeniyatın arttırıw, jaslar arasında jámiyetlik qadaǵalaw sisteması hám onı ámelge asırıw mexanizmleri haqqındaǵı túsiniklerin keńeytiwge qaratılǵan. Sonday-aq, qábiletli hám sociallıq belsendi oqıwshılardı qollap-quwatlaw, jaslar arasında tutınıwshılar huqıqlarına bolǵan qızıǵıwshılıqtı xoshametlew hám keleshekte taraw ushın maman kadrlar tayarlawǵa tiykar jaratıw tiykarǵı maqsetlerden bolıp esaplanadı.
Dáslep bul stipendiya respublikanıń shetki aymaqları – Moynaq, Tamdı hám Swx rayonlarında jaylasqan ulıwma bilim beriw mekteplerinde engiziledi.
Baslama Ózbekstan tutınıwshılardıń huqıqların qorǵaw jámiyetleri federaciyasınıń baslıǵı Jahongir Sarimsoqov tárepinen alǵa qoyılıp, Federaciya Keńesi aǵzalarınıń dodalawınan soń kópshilik dawıs penen maqullandı. Usı tiykarda tiyisli Reje islep shıǵılıp, onda stipendiya alıw shártleri, tańlawdı ótkeriw tártibi hám bahalaw normaları anıq belgilep qoyıldı.
Maǵlıwmat ushın, arnawlı stipendiya hár sherekte, yaǵnıy hár úsh ayda bir márte, qábiletli hám belsendi oqıwshılarǵa beriledi.
Bul baslama tutınıwshılardıń huqıqların qorǵaw sistemasın bunnan bılay da bekkemlew, jaslar arasında huqıqıy sana-sezim hám tutınıw mádeniyatın qáliplestiriwge xızmet etiwi menen birge, shetki aymaqlardaǵı qábiletli oqıwshılardı xoshametlewge qaratılǵan uzaq múddetli investiciya sıpatında áhmiyetke iye.

ÓzA