Búgin BAÁ paytaxtında Sheyx Zoid atındaǵı “Insanıy doslıq” xalıqaralıq sıylıǵın tapsırıw máresimi sheńberinde ótkeriletuǵın joqarı dárejedegi globallıq forumnıń ashılıw máresimi bolıp ótti.
“Insanıy doslıq májilisi” dep atalǵan bul iri ánjumanda sırt ellerdiń Birinshi xanımları, Nobel sıylıǵınıń iyeleri, BMSh agentlikleri hám jetekshi xalıqaralıq shólkemlerdiń basshıları, BAÁ hám Buǵaz mámleketleriniń joqarı mártebeli siyasatshıları, ministrler hám mámleketlik ǵayratkerler, sonday-aq, texnologiya hám jasalma intellekt etikası tarawındaǵı jetekshi ilimpazlardan ibarat 150 abıraylı miyman qatnastı.
Áhmiyetli tárepi, Ózbekstan Respublikası Prezidenti Administraciyasınıń basshısı Saida Mirziyoeva Forumnıń “Hayal-qızlar jetekshiligi insanıy doslıq orayında” atamasındaǵı 1-sessiyasında shıǵıp sóyledi.
Saida Mirziyoeva óziniń shıǵıp sóylegen sózinde hayal-qızlardıń jetekshiligi hám bilim alıw huqıqın insan qádir-qımbatınıń tiykarǵı ólshemi sıpatında qorǵaw ideyasın alǵa qoydı. Bayanatta Ózbekstannıń bul baǵdardaǵı tabıslı reformaları mısalında, hayal-qızlardı sociallıq qorǵaw tek ǵana milliy rawajlanıwǵa emes, al pútkil regionda tınıshlıq hám awızbirshilik ortalıǵın bekkemlewge xızmet etetuǵını ashıp berildi.
“Óz-ara húrmet penen bayımaǵan rawajlanıw uzaqqa sozılmaydı. Kúshli jámiyetler tek ǵana nızamlarǵa emes, al insanlar arasındaǵı óz-ara isenimge de tiykarlanadı, isenim bolsa kóbinese hayal-qızlar arasındaǵı qatnasıqlar hám jetekshilik arqalı bekkemlenedi”, – dedi Saida Mirziyoeva.

Qaraqalpaqstan xabar agentligi