Prezident Shavkat Mirziyoev Nawayı xalıqaralıq aeroportı jumısınıń nátiyjeliligin arttırıw hám aviaciya kárxanaların transformaciyalaw boyınsha prezentaciya menen tanıstı.

Nawayı xalıqaralıq aeroportınıń tiykarǵı kórsetkishleri 2025-jılı 2024-jılǵa salıstırǵanda óskenine qaramastan, hawa kemelerine xızmet kórsetiw, jolawshı hám júk tasıw boyınsha maksimal quwatlılıqlarınan tolıq paydalanılmay atır.

Sonday-aq, aeroport infrastrukturası, texnika parki, júk hám jolawshı terminalların modernizaciyalaw, jumıs processlerin sanlastırıw zárúr.

Prezentaciyada Nawayı xalıqaralıq aeroportın joybarlaw basqarıw principleri tiykarında rawajlandırıw usınıs etildi.

Aeroporttı “Uzbekistan Airports” AJnıń oraylasqan operativ basqarıw sistemasınan ajıratqan halda, oǵan jergilikli hám sırt el aviakompaniyaları menen jolawshı hám júk tasıw, tranzit jáne texnikalıq qonıwlar boyınsha erkin sóylesiwler alıp barıw jáne shártnamalar dúziw huqıqı beriledi.

Aeroport dáramatların onıń infrastrukturasın modernizaciyalaw, janılǵı rezervuarların keńeytiw, hawa kemelerin ońlaw hám boyaw xızmetlerin engiziwge baǵdarlaw arqalı aviaciya xızmetleriniń eksportın arttırıw wazıypaları belgilendi.

Nawayı xalıqaralıq aeroportın rawajlandırıw boyınsha islep shıǵılǵan biznes reje haqqında málimleme berildi. Oǵan bola, kommerciyalıq hám aviaciyalıq emes jumıs kórsetkishleri 50 procentke arttırıladı, 25 ten aslam aviakompaniyalardıń turaqlı párwazları jolǵa qoyılıp, qayta islenetuǵın júk kólemi 20 mıń tonnadan arttırıladı.

Aeroport aymaǵında hawa kemelerine texnikalıq hám kommerciyalıq xızmetler kórsetiwge qánigelesken “porto-franko” erkin bajıxana zonasın shólkemlestiriw usınıs etildi.

2029-jıl 1-yanvarǵa shekem hawa kemelerine xızmet kórsetiw ushın alıp kelinetuǵın arnawlı texnika hám awısıq bólekler bajıxana tólemlerinen azat etiledi. Sonday-aq, aymaqtaǵı miymanxana aeroporttıń qaramaǵına ótkeriletuǵını belgilendi.

Prezentaciyada puqaralıq aviaciyası kárxanaların transformaciyalaw máselelerine ayrıqsha itibar qaratıldı.

Kárxanalar jumısınıń nátiyjeliligin arttırıw hám finanslıq turaqlılıqtı támiyinlew maqsetinde qárejetlerdi qısqartıw, resurslardan aqılǵa uǵras paydalanıw hám tiykarǵı jumıs túrine tán bolmaǵan xızmetlerdi autsorsingke ótkeriw boyınsha kompleksli ilajlar haqqında málimleme berildi.

Energiya únemlewshi texnologiyalardı engiziw, elektr energiyasında háreketlenetuǵın arnawlı transport qurallarınan paydalanıw arqalı ekspluataciyalıq qárejetlerdi azaytıw zárúr ekenligi atap ótildi.

2026-jıldan baslap “Uzbekistan Airways” hám “Uzbekistan Airports” akcionerlik jámiyetleri tárepinen tarawlıq emes jumıstı qarjılandırıw toqtatılatuǵını belgilendi. “Uzbekistan Airports” jumısı 18, “Uzbekistan Airways” jumısı bolsa 16 tiykarǵı wazıypa tiykarında ámelge asırıladı.

Sonıń ishinde, kárxanalarda xızmetlerdiń sapasın arttırıw arqalı básekige shıdamlılıqtı bekkemlew, xızmet hám ónimniń ózine túser bahasın esaplawda optimal metodologiyalardı engiziw, óndiris processleriniń barlıq basqıshların sanlastırıw, kadrlar tayarlaw hám olardıń mamanlıǵın arttırıw tiykarǵı wazıypalar sıpatında belgilendi.

Transformaciya sheńberinde shólkemlestiriwshilik strukturalardı qayta kórip shıǵıw, shtat birliklerin optimallastırıw, xalıqaralıq kredit reytinglerin arttırıw, IPOǵa shıǵıw hám korporativ xalıqaralıq obligaciyalardı jaylastırıw boyınsha ilajlar ámelge asırıladı.

Májiliste aviaciya tarawında kadrlar tayarlaw sistemasın túp-tiykarınan jetilistiriw máseleleri, sonıń ishinde, Puqaralıq aviaciya universiteti hám onıń janında aviaciya texnikumın shólkemlestiriw jumıslarınıń barısı kórip shıǵıldı.

Bilimlendiriw mákemeleri AQShtıń “Embry-Riddle”, Franciyanıń “ENAC” sıyaqlı jetekshi xalıqaralıq aviaciya bilimlendiriw orayları menen birgelikte shólkemlestiriledi. Universitette bort baqlawshısı, aviaciya texnikası boyınsha qánigeler hám mexanikler sıyaqlı ámeliy kásipler menen birge ushıwshılıq, injenerlik, hawa háreketi dispetcherligi, basqarıw boyınsha da kadrlar tayarlaw hám ilimiy baǵdarlamalar jolǵa qoyıladı.

Prezidentimiz usınıslardı maqullap, juwapkerlerge tiyisli tapsırmalar berdi.

ÓzA