Elimizde hár jılı xalıqtıń densawlıǵın qorǵaw hám olarǵa ámeliy járdem kórsetiw maqsetinde «Salamatlıq marafonı» ótkerilip kelinbekte. Bul áhmiyetli ilajdı ótkeriwden baslı maqset – xalıqtıń salamatlıǵın bekkemlew, adamlar arasında keselliklerdi erte anıqlaw hám aldın alıw, sonday-aq, salamat turmıs tárizin keńnen úgit-násiyatlaw bolıp tabıladı.
Bıyılǵı jılı Ellikqala rayonında «Salamatlıq marafonı» ǵalabalıq ilajın 2-fevraldan 28-fevralǵa shekem ótkeriw belgilengen bolıp, kúni keshe usı áhmiyetli ilajǵa start berildi.
Ilajdıń ashılıw máresiminde Qaraqalpaqstan Respublikası Densawlıqtı saqlaw ministriniń birinshi orınbasarı A.Asqarov, Ellikqala rayonı hákiminiń orınbasarı A.Atadjanov, rayonlıq medicina birlespesiniń basshıları, medicina xızmetkerleri hám tiyisli shólkemlerdiń basshıları qatnastı.
Onda shıǵıp sóylewshiler «Salamatlıq marafonı»n ótkeriwdiń áhmiyetine hár tárepleme toqtap ótti.
Sonıń ishinde, rayondaǵı 7 shańaraqlıq poliklinika hám 6 shańaraqlıq shıpakerlik punktlerinde xalıq kontingenti profilaktikalıq medicinalıq tekseriwlerden hám ǵalabalıq skrining tekseriwlerinen ótkeriletuǵını belgilendi. Sonday-aq, sozılmalı kesellikleri bar bolǵan nawqaslar respublikamızdıń jetekshi qánigeleriniń kóriwi hám joqarı texnologiyalıq operaciyalar ushın tańlap alınadı.
– Kórsetpege tiykarlanıp 11 túrdegi laboratoriyalıq hám 7 túrdegi instrumentallıq tekseriwler, sonday-aq, arnawlı tar taraw qánigelerine jiberiw jumısları sistemalı túrde ámelge asırıladı, – deydi Qaraqalpaqstan Respublikası Densawlıqtı saqlaw ministrliginiń Málimleme xızmeti bas qánigesi Gúlzar Jumaǵulova. – Marafon hápteniń barlıq kúnleri, saat 09:00 den 17:00 ge shekem ámelge asırıladı.
Ministrlik tárepinen «Salamatlıq marafonı» respublikamızdıń basqa aymaqlarında da ótkeriliwi rejelestirilgen.

Adilbay Orazov,
Qaraqalpaqstan xabar agentligi sholıwshısı.