Oliy Majlis Nızamshılıq palatasındaǵı “Adolat” SDP frakciyasınıń aǵzası Nodira Rashidova Qaraqalpaqstan Respublikasınıń bir qatar aymaqlarında bolıp, orınlarda ámelge asırılıp atırǵan sociallıq-ekonomikalıq reformalar, dóretiwshilik jumısları hám xalıqtıń turmıs sharayatın jaqsılawǵa qaratılǵan ilajlardıń orınlanıwı menen tanıstı.
Dáslep deputat Shımbay rayonında bolıp, rayon hákimi Aybek Tajetdinov penen ushırastı. Sóylesiw dawamında aymaqtı kompleksli rawajlandırıw, zamanagóy infrastrukturanı qáliplestiriw, jańa jumıs orınların jaratıw hám isbilermenlikti qollap-quwatlaw baǵdarında alıp barılıp atırǵan jumıslar boyınsha pikir alısıldı. Sonday-aq, rayonda qurılıp atırǵan turaq jaylar, sociallıq taraw obektleri hám injenerlik-kommunikaciya tarmaqlarındaǵı qurılıs jumısları kózden ótkerildi.
Sapar etiw sheńberinde “Jańa Ózbekstan” massivinde ámelge asırılıp atırǵan dóretiwshilik jumısları, Sh.Rashidov kóshesindegi abadanlastırıw joybarları jáne bir qatar sociallıq-turmıslıq obektlerdiń jumısı úyrenildi. Joybarlardıń orınlanıwı, sapası hám xalıq ushın jaratıp atırǵan qolaylıqlar boyınsha juwapkerler málimleme berdi.
Ásirese, aymaqtıń óndirislik potencialı da ayrıqsha itibar orayında boldı. Atap aytqanda, “HD SONS” sırt el kárxanasında bolıp, óndiris processleri, kárxana jumısı hám jumısshılar ushın jaratılǵan miynet sharayatları menen tanıstı. Kárxana xızmetkerleri menen sóylesiw ótkerilip, olardıń pikir-usınısları tıńlandı.
Sonday-aq, deputat Ministrler Kabinetiniń 173-sanlı qararı tiykarında ámelge asırılıp atırǵan xalıqtı dizimge alıw procesi menen tanıstı. Bul jumıslar “Xalıqtı dizimge alıw haqqında”ǵı hám “Rásmiy statistika haqqında”ǵı nızamlar talapları tiykarında alıp barılıp atırǵanı atap ótildi.
Deputattıń gezektegi mánzilleri Nókis qalasındaǵı máhálleler boldı. Sonıń ishinde, «Qattıaǵar» hám «Bayterek» máhálleleriniń jumısı úyrenildi. Máhálle jetiligi aǵzaları menen ushırasıwlarda xalıq penen mánzilli islesiw jaǵdayı, sociallıq mashqalalar, máhálle sistemasınıń nátiyjeliligin arttırıw máseleleri dodalandı. Sonday-aq, korrupciyaǵa qarsı gúresiw, xalıqtıń bántligin támiyinlew hám jańa jumıs orınların jaratıw baǵdarında ámelge asırılıp atırǵan jumıslar boyınsha pikir alısıldı. Ushırasıwlar dawamında máhálle jumısın shólkemlestiriwde júzege kelip atırǵan mashqalalar, olardı saplastırıw boyınsha usınıslar tıńlandı hám juwapker shólkemler menen birge islesiwdi kúsheytiw zárúrligi atap ótildi.
Sonıń menen birge, Kegeyli rayonı “Júzimbaǵ” APJ aymaǵındaǵı “Qazayaqlı-abat” awılı turǵınları menen ótkerilgen ushırasıwda kóterilgen ishimlik suwı máselesi de deputat itibarında boldı. Atap aytqanda, awılda 60 qa shamalas xojalıq bolıp, xalıq tárepinen bildirilgen múrájat boyınsha rayon hákimi menen ushırasıw ótkerildi. Mashqalanı sheshiw ilajları dodalanıp, xalıqtı jaqın múddette taza ishimlik suwı menen támiyinlew boyınsha tiyisli wazıypalar belgilep alındı. Bul másele deputatlıq qadaǵalawǵa alındı.
Ulıwma alǵanda, ámelge asırılǵan sapar etiwler aymaqlardaǵı reformalardıń orınlanıwın ornında úyreniw, xalıqtıń múrájatların tıńlaw, mashqalalarǵa ámeliy sheshim tabıw hám parlamentlik qadaǵalawdı kúsheytiwde úlken áhmiyetke iye boldı.

Qaraqalpaqstan xabar agentligi